Бәәдг патьран эврәннь медлд авлһна болзг март сард төгсх
Өнгәр приватизац келһнә болзг төгстл нег сар үлдв. Йирн негдчг жиләс авн Әрәсәд әмтн бәәдг патьрмудыг эзнә медлд авлһна туск закан һарсна хөөн, өнгәр приватизац келһнә болзгнь кесг дәкж хооран саагдв. Эн жилмүдин эргцд Хальмг танһчд әмтн бәәдг цуг патьрмудас йирн тавн процентнь эзнә медлд өггдв. Эн закана болзгнь дәкнәс хооран саагдхий аль мартын нег шинд төгсхий?
Приватизацин болзг хооран саагдхин тускар ода чигн сәәнәр медгдәд уга. Энүнә тускар эндр өдрт ирлцнһү документ ирәд уга. Эн көдлмш күцәжәх специалистнрин тааврар, мартын нег шинд өнгәр кегджәх приватизац төгсх зөвтә. Эзнә медлд орулгдсн патьр ямаран олз-туста бодгин тускар УФРС-ин көдләчнр иим цәәлһвр өгв. Хальмг танһчар УФРС-ин әнгин ахлач Гульнара Умерован келсәр, эврәннь медлд авсн патьриг эзнь хулдж чадх, белглж болх. Эврәннь зөөрән үрдүдтән үлдәж чаджана.
Эндр өдрт танһчин жилишн сангас йирн тавн процентнь эзнә медлд авгдв. Давсн жилин эргцд УФРС-ин специалистнр хойр минһн патьр эзнә медлд орулж өгв. Хальмг танһчар УФРС-ин әнгин ахлачин дарук Элеонора Ходжаеван келсәр, долан хонг болһн приватизац кех арвн эрлһн орж ирнә. Иим эрлһн нурһлж давсн жилин ноябрь сарас авн олар ирдг болв. Март сард приватизац төгсх гиһәд, әмтн олар иржәнә.
Ода улсин ик зунь патьран эзнә медлд оурлж авсн бийнь, зәрм әмтн цаглань иим көдлмш кесн уга. Өнгәр патьран эзнә медлд орулж авхин төлә кергтә документ цуглулж авх кергтә. Энүнә төлә эрлһ орулж өгснә хөөн нег сар болад, цуг кергтә көдлмш кегдх.
Әрәсәд өнгәр кедг приватизац төгсхлә, мартын нег шинәс хооран энүг мөнг өгәд күцәж болх. Гульнара Умерован келсәр, мөнг өгәд приватизац кеж болх бәәдлтә. Зөөриг государств эзнә медлд хулдх чигн шиидвр һарх. Энүнә тускар ода документ һарад уга.
Арстана Светлана, Ирчин Алексей
