Бу-селм хадһлжах улсиг бүрткж хәләв
Оперативн болн гетлүлгч керг-үүлдврин йовудт бу-селм, сум болн хаһрдг эв-арһ илткж авлһна төлә хойр минһн күн бүрткж хәләгдв. Энүнә ашт МВД-н көдләчнр зун хөрн долан зака эвдж хадһлгджасн бу-селм илткж авв. Бу-селм хадһлх зөвшәлтә әмтн энүг хажһр хадһлжана гиж полицин көдләчнр зәнглв. Зәрм улс бу-селмиг чикәр хадһлжана.
Зөв-йос харлһна органмудын көдләчнр темдглж бичгдсн бу-селмтә улсиг жил болһн бүрткж хәләнә. Бу-сел яһж хадһлгджахинь, кергтә цуг документ бәәхинь эдн шинжлнә. Вячеслав Абушинов кесг жилдән анһучлжана. Нурһлж шовуд болн үүрмг мал-аһрус анһучлна. Мал-аһрус хаж авх һол күцл биш. Теегт һарад цевр аһар кииләд, сергмж авхла сән болан гиж Вячеслав келнә. Гертән төмр сейфд цуг неквр күцж тавн бу-селм хадһлжана.
Вячеслав Абушиновин келсәр, түрүн бу-селм энүнд эцкнь үлдәж. Энүнә хөөн эврән бас хулдж авсн бәәж. Һурвн үрән өскжәнә. Эднд бас эн зөөриг үлдәх санан бәәнә.
Бу-селм олзлж зака эвдсн йовдлмудас гетлүлхин төлә болн олна әәмшг уга бәәдл теткхин төлә МВД-н көдләчнр оперативн гетлүлгч керг-үүлдвр күцәв. Зака эвдж бу-селм, сум болн хаһрдг эв-арһ хадһлжах улс энүг бәәсн һазртан дотр-дундын кергүдин органмудт орулж өгх селвг МВД-н көдләчнр олн улст өгчәнә.
Танһчин МВД-н барин церглтин көдләч Андрей Басхаевин келсәр, МВД-н көдләчнр күцәсн керг-үүлдврин йовудт зака эвдж хадһлгджасн зун хөрн долан бу-селм илткж авгдв. Тер тоод йирн долан бу болн һучн нәәмн сумн бәәж. Тер мет эс темдглж бичгдсн арвн хойр бу-селм илткж авгдв. Хун арвн негн күн административн засгла харһулгдв. Ут-тоодан нег минһн нәәмн зун күн бүрткж хәләгдв. Зака эвдж бу-селм хадһлжах улс уголовн засгла харһулгдх Әрәсән закан бәәнә. Эврә дурар бу-селм орулж өгсн улс уголовн засгла харһулгдшго.
Ода мана танһчд темдглж бичгдсн бу-селм нурһлж анһучнр гертән хадһлжана. Иим ик кезәнк авьяст олн улс дурта. Эднә ик зунь бу-селм хадһлх цуг некврмүд күцәжәнә. Тер бийнь әәмшг уга бәәлһнә тускар мартхмн биш. Тегәл бу-селмиг цуг зокал күцәж хадһлх кергтә гиж МВД-н көдләчнр саглулжана.
Елена Алексенко, Ирчин Алексей
