Билгтә актер Владимир Базыров 33 жилдән келн-улсин театрт көдләд, кесг соньн дүр наадв
Хальмгин билгтә актер Владимир Базыров һучн һурвн жилдән Баснга Баатрин нертә театрт көдлжәнә. Эн жилмүдин эргцд өөдән ачлвр авхар көдлсн уга, тер бийнь Хальмг танһчин әмтн болн талдан чигн регионмудын улс энүнд билг-эрдм дурлж, наадсн дүрмүдинь удан тодлна. Базыров билгтә артист болсн деерән, цаһан седклтә, төвкүн зангта һольшг күн.
Хальмг танһчин олн-әмтнә артист Владимир Базыров мана үүдәгч багд өгсн интервьдан иигж темдглв. Театр мини хөв. Энүнлә мини үүдәгч болн онц жирһл өөрхн залһлдата. Театрт көдлжәһәд, нертә актрис Вера Тепкеевала таньлдад, өрк-бүлән тогтав. Авальнь Владимирт һол түшг болв, көвүнь болхла, ик байр эднд үүдәжәнә. Ода эк-эцкнрнь көвүнә иргчин тускар ухалжахш. Актер болхин тускар санжасн угав гиж Владимир инәмсклж келнә. Иим эрдм генткн ирв. Тер цагт драмтеатрин директор болж көдлжәсн Тачин Анжа Владимирин эк-эцклә нәәжнр бәәж. Тегәд үүдәгч билгинь тускар меддг директорин нилчәр, баһ наста көвүн театрт ирв. Хальмгин олн-әмтнә артист Владимир Базыровин келсәр, деед сурһульд зурачнрин үүдәврмүд үзүләд, артистын эрдмлә дүнцүлдг бәәсмн. Үлгүрнь, боярыня Морозован хәләц үзүлв. Иим зурачнрас бас дамшлт авх кергтә болжана.
Далн дөрвдгч жилд театрт ирснәс авн һучн һурвн жилдән актер болж көдлжәнә. Иим эрдмәр экләд көдлсн цагт театрин жирһл болн энүнд көдлжәх улс баһ наста көвүг авлв. Энд актерын байн дамшлт хоршаж чадв. Уйн наста Базыров тер цагт энд көдлжәсн нертә артистнрла хамдан көдлсндән ик байрта бәәнә. Тер цагт энүнд һол дүр наадх арһ уга бәәсмн. Нег жил болад, Москва балһснд орн-нутгин хамгин сән гисн театральн ГИТИС-ин оют болв. Түрүн авгтан иим хөвтә бәәсндән итксн уга. Зуг Москвад сурад, оюни халхар сән сурһмж авч чадв. Тенд үүдәгч билгин халхар чигн ик дамшлт хоршав. Владимир Базыровин келсәр, Василий Лановойин наад хәләв гиж нәәжнь келж. Мана актермуд бас билгтә сәәнәр наадна. Тер цагас авн олн әмтн театрт олар ирдг боолв.
ГИТИС төгсәсн баһчуд хәрү Элст балһснд ирсн хөөн, эдн тер дарунь театрин ханьд дәкнәс экләд көдлв. Найдгч жилмүдт актер Базыровин үүдәлт хамгин өөдән кемжәнд күрв. Тер цагт актермуд кесг нааднд орлдцг бәәж. Онц келхд, Владимир тиигхд һол дүрмүд чигн наадв. Ода Абдуллина бичсн “Тринадцатый председатель” пьесар белдсн наадыг Базыров йир сәәнәр тодлна. Эн үүдәвр советин йосна цага нааднас икәр йилһрдг бәәсмн. Актерын келсәр, эн наадн перестроечн шин цаг ирхинь меджәсн бәәдлтә. Эн нааднд Базыров шоогдсн директориг харссн парторгин дүр наадв. Тиигхд Хальмг танһчд иим нааднд олн улсиг икәр үүмүлв. Нег үлү, түрүн үзүлврт нертә советск актер Василий Лановой наадсн билә. Иим ачта артистла наадхд түрүн авгтан невчк үүмәтә болв. Болв нег саамд бахмжта болна гиж Владимир келнә. Дәкәд болхла давсн зун жилин күнд йирдгч жилмүдин тускар бас тодлна.
Тиигхд театриг хаахар седсмн. Кесг билгтә артистнр эрдәмн хаяд, талдан көдлмшт орв. Үлдсн үүлдәчнр күнд түрү цаг дааһад һарв. Эднә нилчәр театр хаагдсн уга. Нег үлү, келн-улсин театрин программд мюзикл орв. Энүнд билгтә актер Владимир Базыров дууна билгән делгрүлж чадв. Зая Пандита нааднд наадад, Монһлд болн ар Осетьд болсн фестивальмудт лауреатын нер зүүв. Владимир Базыровин келсәр, Сергей Гаданов сән наад тәвлә. Валентин Валентина, Поезда без расписаний. Энүнд тәвсн нааднд бас дүрмүд наадж.
Сүл жилмүдт болжах хүврлтиг актер дөннжәнә. Энүнә келсәр, ТЮЗ театрла негдсн хөөн, үүдәгч хаалһ шин девснгд орв. Ода артистнр көдлмштән урдк кевәр өдр-сө уга гилтә көдлжәнә. Сүл өрәл жилд Баснга Баатрин нертә театр олн-зүсн соньн наад белдв. Тер тоод “Чууча”, “Кенз байн”, “Булһн” болн нань чигн наадд олн улсиг икәр байрлулв. Удл уга эдн шин наад үзүлх зурата. Энүнд танһчин билгтә актер Владимир Базыров бас орцлж, хәләһәчнрән байрлулхнь лавта.
Чучян Валентина, Ирчин Алексей
