Баснг Городовиковин санлд нерәдгдсн бөк бәрлдлһнә марһан болв
Элст балһснд Советск Союзин Герой генерал-лейтенант Баснг Городовиковин санлд нерәдгдсн вольн янзар бөк бәрлдлһнә цугәрәсән марһан төгсв. Энүнд диилвр бәсрн бөкнр спортын мастерин цол зүүв. Иим күндтә нерн Хальмг танһчин бөк Александр Менкеновд зүүлһгдв.
Чемпионатд Әрәсән Өмн үзгин болн Ар Кавказин федеральн округсин хамгин сән гисн бөкнр орлцв. Долан чиннүрин категорьт зун тәвн спортсмен дииләчән йилһж, спортын мастерин цол зүүхәр зүткв. Хамгин сән гисн бөкнр марһана зуг чилгчд йилһрв. Әрәсән ачта тренер, нарта-делкән категорин зарһч Рамис Гусейновин келсәр, бөкнрин ноолдан йир соньн зүткәтә болв.
Марһана ах зарһч Петр Саргассовин келсәр, товчлгч марһанд ноолдажх бөкнр диилвр бәрхлә, спортын мастерин цол зүүх. Эннь ик чинртә дөрлдәнә герч болжана.
Зүткәтә ноолдана йовудт марһанд орлцачнр цуг арһ-чидлән, дамшлтан үзүлж, ямаран белдв кесән медүлв. Эн өдр бөкнрлә хамдан зарһчнр ичгн невчк үүмәд бәәв. Зарһчнр бөкнриг чаню неквртәһәр үнлж, спортсмена хажһр үүлдвриг эс гиж эс ноолдх санаг чанһар шинжлж бүрткв. Болв арһ уга неквр ямаран чанһ болв чигн, ноолдх кергтә болв.
Марһан Советск Союзин Герой, генерал-лейтенант Баснг Городовиковин санлд нерәдгдж давулгд Баатр-зөрмг дәәч жирһлин хаалһдан кесг күнд-түрү үзсмн. Дәәнә цагт цус-махан асхж, хөөннь чидлән әврлгго көдлсн төләд энүг йоста олн-әмтнә герой гиж тоолна. Городовиковин нериг һуташгон төләд бөкнр цуг арһ-чидлән агсж ноолдв. Үлгүрнь, Александр Менкенов йир сәәх диилвр бәрж чадв. Аштнь Менкенов түрүн орм эзләд, спортын мастерин цол зүүв. Спортын мастер Александр Менкеновин келсәр, ик байрта бәәнәв. Олн жилдән бөк бәрлдлһнә эрдм дасчана. Ода спортын мастерин нер зүүв.
Тер мет марһана гиичнр хам-хоша бәәх регионмудас ирсн спортсмпенмүд бас сән белдвр үзүлв. Дагестан, Ингушетин болн Ар Осетин бөкнр дииләчнрин болн призермудын тоод орв. Вольн янзар бөк бәрлдлһн спорстмена цогц-махмуд батрулсн деерән, зангин батрулж, бийдән иткүл авхд дөн болна. Спортын халхар сән күцәмж бәрсн деерән, бөкнр жирһлин хаалданг чигн сән үзмж бәрнә гиж келж болх.
Елена Алексенко, Котина Валерий
