Бачм чинртә медицинск дөн күргдг хойр церглт көдлжәнә
Элст балһснд өрәл жилдән бачм чинртә медицинск дөн күрглһнә хойр әнг көдлжәнә. Эннь түргн бачм чинртә болн хотл балһсна поликлиникин медлд бачм чинртә дөн күрглһнә церглт. Иим хойр түрүн хәләцд әдл церглт өдр болһн олн улст ик нөкд болна.
Элст балһсна бачм чинртә медицинск дөн күрглһнә церглтин көдлчәчнрт ода хойр дам байр үүдәгдв. Түрүн болж сүл аврн жилин туршарт эднд үвлин шин хувц өгв, автопаркд шин хойр автомобиль ирв. Артем Васкеев энд жолач болж дөрвн дундур жилдән көдлжәнә. Сүл цагт көдлхд амр болв гиж маши залач келнә. Артем Васкеевин келсәр, ода балһсар йовхд невчк амр болв. Зууран машин эвдрх гиж әәжәхш. Шин машин сәәнәр йовна.
Тер мет бачм чинртә дөн күрдг станцин көдләчнрт эн халхар болжах хүврлт бас сән нилчән күргжәнә. Медикүдин келсәр, ода эн церглт хойр әнгәр хувагдв — түргн бачм чинртә болн бачм чинртә дөн күрглһнә әнг бәәнә. Эннь хойр церглтин көдлмшиг олз-тустаһар кехд сән нилчән күргжәнә. Түргн бачм чинртә церглт гисн әмтн әәшгтә бәәдлд тусад, эрк биш ахр болзгт эмнчрин дөн күләжәсн улст һарч йовна. Бачм чинртә дөн гиснь — эврәннь чидләрн поликлиникд йовж чадшго гемтә улст оддг церглт болжана. Бачм чинртә дөн күргдн станцин ах эмчин дарук Киштя Хулхачиеван келсәр, иим хүврлт кегднәс иштә эмчнр хоосар ик учр угаһар һарч йовдг йовдлмудын то баһрв. Тегәд чигн ода дежурн бригадмудын то арвнас нәәмнд баһрулгдв.
Бачм чинртә медицинск дөн күргдг станцин ах эмчин дарук Киштя Хулхачиеван келсәр, ода өрүн нәәмн часас авн асхн нәәмн час күртл көдлхлә, гемтә улст йовдг то баһрв. Эдн амрлһна өдрмүдт бас иигж көдлхлә сән болх билә.
Эмчнринр тоолврар, хуучта улст тер тоод онкологическ, зүркнә, өөшгин, геснә гемтә әмтнд, шав авсна хөөн учрдг өвдкүр, ОРВИ болн грипп гемәс көлтә халу дүрсн цагт һарч йовлһн дегд ик бачм керг биш болжана. Иим цагт зуг бачм чинртә церглтин эмчнр ирх. Энүнә төлә 4-21-11 телефоһар жиннүлж болх эс гиж түргн бачм чинртә дөн күрдг церглт иим зәнг эднд өгх зөвтә.
Элст балһсна поликлиникин ах эмчин дарук Кема Чужаеван келсәр, иим церглтин көдлмш сәәрв. Юнгад гихлә, иим гемтә улст манһдуртнь гемтә күүнд участкин эмч ирх зөвтә. Иим эмчнр ирхлә эдн өврх зөв уга.
Иим кевәр церглт өрәл жилдән көдлжәнә. Иим эв-арһ Элст балһсна улст тааста болжана. Болв зәрм әмтн иим хүврлтин тускар медлго, урдк кевәр 0З телефоһар жиннүләд дөн сурна. Иим улст эрк биш нөкд болхла церглт белн бәәнә.
Татьяна Дмитриева, Хавтхна Анатолий
