Ик кезәнә цагт цокж авсн кинозургуд әмтн бийән таньжана
Давсн сарнг өдр Бийән тань нертә төсвин йовудт мана программ Яшкулин района нег совхозд олна малд хот белджәх зург үзүлсн билә. Һучн жил болад архивн зургт һарсн күүнлә мана үүдәгч баг харһад күүндж чадв. Тиигхд Яков Бухмиллер механизатор болж көдлжәж.
Нег минһн йисн зун далн нәәмдгч жил. Хальмгин АССР-ин Яшкулин района КПСС-ин хөрн дөрвдгч сьездин нертә совхозд олна малд хот белдж авчана. "К-700" тракториг арвн долан наста Яков Бухмиллер залжана. Эн зургт дамшлтта механизатор болж үзгднә. Бичкн цагасн авн зунын амрлһна кемд нәәмдгч классас авн совхозд механизатор болж көдлжәсн эцкдән оньдин дөн болдг бәәж. Эднә өрк-бүлд арвн күн бәәж. Яков ууһн көвүнь. Тегәд чигн эк-эцкдән нөкд-түшг болдг билә. Һольшг зангта болн дааврта бичкн көдләч эдл-ахуд йоста сән нөкд болв. Тегәд чигн совхозин һардвр школан төгсәсн Яковиг көдлмшт дуудв. Цергт мордхин өмн энд һурвн дундур жилдән көдлсмн. Цергин хөөн эврәннь эдл-ахуд ирж көдлв. Энүнә тускар Яков маднд келж өгв. Һучн жил болад мана үүдәгч баг хуучн зургудын нилчәр энүнлә болн Наталья авальтан һарһж чадв. Иим зургуд Бийән тань нертә “Вести-Калмыкия” программд үзүлгдсн билә. Наталья Бухмиллерин келсәр, “Вести — Калмыкия” асхна һарцд эн зург үзүлж. Эгчнь жиннүләд Яковиг үзүлв гиж зәнглж. Баһ цага зург бәәж. “Элиставодоканалын” маши залач Яков Бухмиллерин келсәр, эцктәһән хамдан көдлжәсн бәәж, Ик Кировец трактор өгсн билә. Тиигхд урһц хураж авсн кем бәәж. Теегин өвсн сән болн ислос даржасн көдлмш кегджәлә. Тиигж көдлжәхлә зург цокж авч гиж Яков тодлна.
Яков болн Наталья найн һурвдгч жилд өрк-бүлән тогтав. Элст балһснд маши залачин сурһуль дасжасн кемд Наталья күүкнлә таньлдж. Найн тавдгч жилд эднә өрк-бүл Элст балһснд нүүж ирв. Тиигхд Наталья хулд-гүүлгәнә халхар көдлжәлә, ода гер-малан ахулжана. Наталья Бухмиллерин келсәр, хөвтә күүкд күн бәәж. Авальнь йоста сән түшг болв, цаһан седклтә, йир дааврта күн. Күнд цагт нөкд болна.
Яков Яшалтан немш күүнә өрк-бүлд төрлә. Тегәд чигн көдлмштән эвтә-довта болв. Элст балһснд түрүн авгтан ПМК-д маши залач болж көдлв, электроһаннлһна эрдм дасв. Эн эрдмәр водоканлын залдтд орж көдлж. Ода энд ода күртл көдлжәнә. Эн жилин октябрь сард энд көдлснәс авн хөрн жил болх. Яков Альбертович кесг дәкж усна сурвлжнд учрнс эвдрлт ясла. Иим көдлмш амр биш. Өдр-сө уга гилтә, хур-цаснд һаза даарад-көрәд көдлх кергтә болв. Яков Бухмиллерин келсәр, көдлмш дегд күнд. Нег үлү сөөднь көдлхд амр биш болдг бәәсмн.
Хойр жил хооран дәкнәс маши залачин көдлмшт орв. Ода баһ наста жолачнрла дамшлтарн хувалцжана. Коллективд энүг икәр күндлж тевчнә. “Элиставодоканалын” ах инженер Павел Убушаевин келсәр, байн дамшлтта, эврәннь эрдмән сәәнәр меддг күн. Ода иигж көдлдг улс ховр. Бийдән суудг сандл кеж авла. Энд-тенд йовхларн сууһд, һаннлһна көдлмш кенә. Иим дааврта кү түрүн болж үзжәнә.
Яков болн Натлья Бухмиллерихн хойр күүк өскәд кү кев. Ууһн күүкнь зе күүк һарһв. Ода хойрдгч үрән күләжәнә. Ода ээж-аавнь зе көвү һархинь тенкән уга гидгәр күләжәнә.
Татьяна Зубцова, Колдан Церн
