Ик-Буурла района бичкдүдин үүдәлтин герт бичкдүдт өвәрц эрдм дасхжана

Нәрн эрдм бичкдүд дасжана. Ик-Буурла района бичкдүдин үүдәлтин герт багшнр сурһульчнриг һарин өвәрц эрдмлә витражла таньлдулж дасхжана. Эн дүрслгч искусствин эрдм байн туужта. Энүнә тускар кесг жил хооран әмтн меддг бәәж. Өдгә цагт чигн шил деер зург зурдг эрдм олн улсиг ке-сәәхн үүдәвр болж соньмсулжана. Энүнд мана үүдәгч баг герч болв.Шилд зург зурдг әмтн ке-сәәхн, олн-зүсн өгнтә кегдлмүд кеж һарһна.

Зуг иим кевәр йоста витражн искусствин үүдәврмүж кеж болх. Иим эрдм жанһрта болн күнд. Зуг түрүн хәләцд эн көдлмш амр, һартан карандаш авад, шил деер зург зурчкад, энүг ширднә. Баира Цыганкова иим соньн эрдмиг бикчкдүдт дасхжана. Ода Баира бичкдүдин үүдәлтин герт багшлжана. Энүнә һарджах витражн искусствин кружокт хамгин олн көвүд-күүкд ирнә. Иим зург үүдәһәд, олн әмтнд байр үүдәснд кежәх көдлмштән ик дуран өгч күцәснә аш болжана гиж эрдмч келнә. Баира Цыганкован келсәр, бийдән тааста эрдмәр көдлхлә, талдан улс бас иим көдлмшәр соньмсна. Аштнь нааран олн бичкдүд ирәд, сул цаган олз-тустаһар давулжана.

Саша Манджиева витражн искусствин кружокт зуг одахн көдлдг болв. Энүнлә хамдан сурчах күүкд ик кезәнәс авн энд оржасн бәәж. Ода Саша эврәннь түрүн зурган үүдәжәнә. Энүг энкр экдән белглх саната. шил деер зург зурхд йир соньн болсн деерән. иим көдлмш кехлә чееж сергнә гиж күүкн келнә. Иргчдән зурачин эрдм дасх саната. Саша Манджиеван келсәр, өсхләрн би бас бичкдүдт иим соньн эрдм зааж өгх санатав. Нанд иим урн һарин эрдм йир икәр таасгдна.

Ода деерән Саша витражн искусствин халхар түрүн ишкдлән кежәнә. Витраж кехин төлә шишлнг шир болн шишлнг пленк кергтәһинь меднә. Эннь зуг эклц болжана. Хөөннь йосндан зург яһж зурхин тускар дасж авх. Түрүн авгтан дамшлт хоршаж авх кергтә, цаарандан эврә ухан-санаһан орулад олн-зүсн үүдәвр кеж болх гиж Саша келнә. Тегәд нәәмн наста күүкн эврәннь дурта эрдмән олж авв гиж келж болх.

Азыда Надежда, Колдан Церн