Ик-Буурл района арвн зурһан баһ наста эмчнр федеральн программин орлцачнр болв

Ик-Буурл района арвн зурһан баһ наста эмчнр федеральн программин орлцачнр болв. Эн программар орн-нутг һарһж өгчәх мөнгән эдн авчксн бәәнә. Селән һазрт көдлжәх эмчнр мөнгән яһж олзлхан бас меджәнә.

Терапевт Кермен Манджиева федеральн программар нег сай арслнг авсн эмчин негнь болжана. Әәдрхн балһсна эмчин академь чиләснә хөөн нег жилдән танһчин больницин диагностическ цутхлнгд көдлсн болдг. Хөөннь программин тускар сонсад, медәд, селән һазрт күрч көдлх седкл зүүсмн.

Медицинск номин кандидат Елена Тюрбеева бас тавн жилә бооца батлсн бәәнә. Программар мөнг авсн цуг эмчнр мет Елена Пюрбеева авсн мөнгән бәәр хулдж авлһнд һарһв. Урднь эн эмч Санкт-Петербург балһснд номин-шинжллһнә институтд көдлж йовсмн. Эврәннь герин эзн күүнтәһән төрскн һазртан ирж бәәршлх сана зүүжәсн цагла дигтә эн федеральн программ батлгдсн болдг. Ик балһдас энд көдлхд невчк амр болв көдлмшин бәәрн зөвәр йилһрнә гиж баһ наста эмч келнә.

Иим баһ наста болвчн дамшлтта эмчнр ирснд бәәрн әмтн байрта бәәцхәнә. Эврә кергән сәәнәр медж күцәсн деерән маднла олн-зүсн тренинг давулад нөкд болна гиж келцхәнә. Александра Сангаева һурвдгч үрән күләжәнә. Урд цагт мана саата күүкд улс балһс орад, дөнг авдг бәәсн болхла, ода дурта цагтан бәәрн эмчнртән ирнәвидн гиж Александра Сангаева келнә.

Ик-Буурла районд ирж көдлжәх специалистнр дунд нурһлж олн эв-арһин эмчнр болн терапевтмуд. Урд цагт эмчнр хойр-һурвн һюазрт — больницд, поликлиникд, бачм дөнг күргд цутхлнгд селгәдәр көдлдг билә, ода болхла эн төр йосндан ясрв гиж района цутхлнг больницин ах эмч Киштә Бакаева байрарн хувалцна.

«Селәнә баһ наста эмчнрт — нег сай арслнг» гидг программин ашнь сән болжана. Зуг района цутхлнг больниц бәәтхә, селән болһна больниц эмчин специалистнрар теткгдсн бәәнә. Цааранднь ямаран болхинь цаг медүлх.

Ээнән Ольга, Очра Сергей