Хуралын депутатнр Яшалтинск района әмтнлә харһад күүндв
Хальмг танһчин олн.әмтнә хуралын депутатнр болн министерствсин элчнр Яшалта селнәд Дмитрий Медведевин олна приемнд бәәрн улсин төрмүдән күүндвр кев. Энүнд нурһлж уудг усар тетклһнә, залһлдана болн хаалһсин туск төрмүд босхгдв.
Петр Васильевич Стуков танһчин һардачнрт хоосн ирсн уга. Газ олзлсна мөнг өгсн кесг квитанц, пенсионн болн льгтон документмуд авч ирв. Эн күн ор һанцхн сурвр өгв.
Яшалтинск района ветеранмудын хүүвин ахлач Валентина Шульга келсәр, ода районд газин тускар сезонн коэффициент олзлгджана. Ростовск областьд болн Ставропольск крайд иим коэффициент уга. Энд болхла ветеранмуд иим ик мөнг өгч чаджахш. Хальмг танһчин ЖКХ-н болн энергетикин министрин дарук Сергей Точка келсәр, һаза бәәх счетчикүдт намрин-үлвин кемд коэффициент олзлгдна. Әмтн арһта болхла гертән счетикүд тәвж чаджана. Энүнә тускар закан бәәнә.
Веселое селәнә бәәрн әмтн района улсиг үүмлжәх дәкәд нег хурц төрин тускар келж өгв. Эн күүкд күүнә келсәр, гертнь цуг бәәцин техник шатад эвдрв. Эн төр яһж хаһлхмб? Министрин дарук Сергей Точка келсәр, эн төриг "Калмэнерго" ниицәнд тәвх кергтә.
Болв хамгин хурц төрнь — уудг усар тетклһнә төр болж һарв. Энүнә тускар бәәрн әмтн олн-әмтнә хуралын депутатнрт болн региоанльн министерствин элчнрт тодхрхаһар келж өгсмн. Хальмг танһчин ЖКХ-н болн энергетикин министрин дарук Сергей Точка келсәр, эндр өдрт танһчин улсиг усар тетклһнә төр шинлгдв. Ода хойр зун дөчн селәнд эн төр хаһлх кергтә. Энүг хаһлх зөвтәвидн. Юг России программд нәәлжәнәвидн.
Тер мет бәәрн йосна элчнрт келх төрмүд бас бәәнә. Баһ тугтна сойлын герин һардач Валентина Вазгеймин тоолврар, муниципальн бюджет эднә төрмүдиг хаһлж чаджахш. Баһ Тугтн селәнә сойлывн герин директор Валентина Вазгеймин келсәр, жавл өгхин төлә мөнгн уга гиж селәнә ахлач зәнглв. Апрель-март сард өгх. Цааранднь декабрь сар күртл мөнгн уга болх. Яһж бәәхмб?
Яшалтинск района селәнә муниципальн бүрдәцсин толһачнр эдниг үүмүлжәх төрмүдин тускар бас келж өгв. Эднд йилһж өгсн мөнгн һарһсн һаруһас кесг холванд баһ болжана. Селән болһнд жавл өглһнә, хаалһс тосхлһна болн эдниг яслһна, коммуникацин төрмүд толһачнр хаһлх зөвтә. Һазрин болн зөөрин алвна мөнгн болхла зуг ноябрь сард ирнә. Ирсн мөнгнә кемжән дегд бичкн болжана. Эн күүкд күүнә келсәр, эрлһ бичәд көдлмшәсн һарх кергтә. СМО-д орж ирдг мөнгнә системиг сольх кергтә.
Дмитрий Медведевин олна приемнд болсн күүндврин ашт танһчин хамгин хруц төрмүд босхгдв. Эдниг хаһлхин төлә ирлцнһү зака батлж авх төр босжана. Хальмг танһчин олн-әмтнә хуралын ахлачин дарук Хонһр Эльбиковин келсәр, энд кеслн төр болһна тускар ирлцнһү министерствд эрлһн йовулгдх. Күн болһна төр бүртклһнд авгдх.
Хавтхна Элла, Хавтхна Анатолий
