Хулд кесн улсин меклхлә, засг чанһржана
Хулд кесн улсин меклсн төләд, болзгнь давсн эд-тавр хулдснд ялын кемжән кесг холванд өсх. Эдләчнрин зөв эвдснд административн засг чанһахин туск закан Государственн Думин депутатнрин хәләврт орулж өггдв. Шин закаһар хйордад хулд кесн улсиг меклхлә, юридическ улс нег сай ял өгх эс гиж үүлдврән зогсах. Ода болхла хулд кесн кү меклхлә хойр минһн арлснг ял өгх кергтә. Тегәд ялын кемжән бичкн болад, арһлачнр дуту-дундсан чиклхәр адһжахш.
Ода бичкн магазидт болн ик супермаркетмудт болзгнь давсн хот-хол олж авч болх гиж Элст балһсна бәәрн күүкд күн Алла Степанова келнә. Одахн эн күүкд күн му чинртә эд-тавр хулдж авсн бәәж. Зуг энүнә тускар гертән ирәд медж авч. Тегәд тер цагас авн хот-хоолын эс гиж эд-таврин болзинь хәләж хулдж авдг болв. Кемр алмацхла, хулдачнрас эт-таврин чинрин туск цаас сурна. Салат хулдж авч. Болзгнь давсн бәәж, исж одв. Хәр үөгс угавидн. Кесг дәкж болзгнь давсн кефир хулдж авсн бәәж. Тер мет ээзгә бас хуучн бәәж. Энүг сольж авх кергтә болв.
Тер саамд давсн жилд Роспотребнадзорин специалистнр әмтнә орулж өгсн эрлһәр хойр зун тәвн зура уга бүртклһ кев. Энүнә ашт зун найн күн администравтин засгла харһулгдв. Тер тоод зака эвдсн йовдлмудас нурһлж тәмк розничн үнәс үнтәһәр хулдлһна, болзгнь эс бичгдсн әмтәхн хот-хол хулддг йовдлмуд, эд-тавр хадһлһан зокал эвдсн йовдлмуд илткгдв. Тер мет онц арһлачнрин саунд му чинртә туслжм күрглһнә тускар әмтн эрлһ орулж өгв. Онц келхд, Му чинртә туслмж күргжәх халхс дунд хулд-гүүлгән болн ЖКХ-н халх темдглх кергтә.
Роспотребнадзорин заллтин әнгин ахлач Татьяна Проничеван келсәр, ода хулд-гүүлгәнд нурһлж техническ халхар жанһрта бәәцин эд-тавр хулдгджана. Урдаснь кесн даалһврар, хулдачнр цаглань эд-тавр авч ирхш. Кемр му чинртә эд-тавр хулдж авхла, энүг сольж авх закан бәәнә. Хөрн хонгин эргцд сольж авч болх. Хулдачнр зәрмдән зака эвднә.
Ода арһлачнрт зака күцәхин ормд ял өгснь амр болна. Ода ялын кемжән һучн минһн арслнг тогтажана. Эннь юридическ улсин ял. Хулд кесн күүг меклхлә, хойр минһн арслнг ял өгх зөвтә. Ода эдләчнрин зөв эвдхлә чанһ административн засг орулхин тускар Госдумд ирлцнһү закан хәләгджәнә. Тиигхлә Роспотребнадзорин заллтин специалистнрин келсәр, эн халхд бәәдл ясрх зөвтә. Болв ялын кемжәг дегд икәр кеж болшго. Энүнә тускар депутатнр ухалх зөвтә.
Роспотребнадзорин заллтин әнгин ахлачин дарук Валерий Джавруновин келсәр, ялын кемжән зака эвдсн йовдлла ирлцх зөвт. Энүг икдүлх керг уга. Энүнә тускар Госдумин депутатнр келнә. Нег үлү, мана регионд ялын кемжәг икдүлх керг уга.
Күн болһн эврәннь зөвән харсх йовдлла эрк биш харһна. Болв ода зуг эврән бийдән нәәлх кергтә болжана. Тегәд эд-тавр эс гиж хот-хол хулдж авхларн болһамжтаһар хулд кех кергтә.
Ээнән Ольга, Хавтхна Анатолий
