Художественн школд бичкдүдин зургудын һәәхүл секгдв

Танһчин нертә зурач Һәрә Олегович Рокчинскийн йирн насна өөнд нерәдгдсн һәәхүлд художественн бичкдүдин школын сурһульчнр эврәннь көдлмшән үзүлв. Энүнә көвүд-күүкд тохнята белдвр кев, Рокчинскийн намтр болн үүдәлтин туск материлмудла таньлдв.

Екатерина Шевченко болн Ольга Пюрбеева нег класст сурчана. Һәрә Рокчинскийн йирн насна өөнд нерәдгдсн һәәхүлд күүкд эврәннь көдлмшән болн герин даалһвран үзүлв. Энг-зах уга тег зурачин һарт нертә зург зурхин төлә сурһульчд һурвн долан хонг кергтә болв. Ольга Пюрбеева болхла гуашар зурсн Этюд нертә үүдәврән үзүлжәнә.

Екатерина Шевченко келсәр, Рокчинский нертә хальмгин зурач, төрскнч учр-утхта зургуд таасгдна.

Ольга Пюрбееван келсәр, бичкдүдт нертә зурачин тускар медүлх кергтә. Ямаран зургуд зурдг бәәсн тускар келж өгхлә сән болх.

Бичкдүдин художественн школын сурһульчнр һәәхүлд Пленэр, Тег нертә ут-тоодан дөчн зруг тәвж. Эн көвүд-күүкдин төлә Һәрә Рокчинский хальмгин йоста алдр үүлдәч гиж тоолгдна. Сурһульчнрин келсәр, Рокчинскийн үүдәврмүдт келн-улсла өөрхн залһлдан бәәхнь үзв. Көвүд-күүкдин тоолврар, иим ке-сәәхн кеәвр йиртмжиг күн болһн зурж чадшго.

Эн күүкнә келсәр, зург болһн чикәр эс зургдсн бийнь, сурһульчнр үүдәвр болһниг седклән өгч зурв. Рокчинскийн үүдәлтд дурта. Энүнә Хавр нертә зургт ке-сәәхн өнг орулж гиж эн сурһульч келнә.

Нертә зурачин күүкн Светлана Батыреван келсәр, Һәрә Рокчинский билгтә зурач болсн деерән, туужин шинжләч гиж тоолгджана. Һәәхүлд Светлана Батырева күндтә гиич болв. Һәрә Рокчинскийн үлдәсн зөөр — Хальмг улсин сойлын үнтә зөөр болж үлдв.

Эн зурачин келсәр, цуг зурачнр эн школыг төгсәв, иим сән һәәхүл секгдснь байр үүдәв. Цуг көдлмш соньн болж медгдв. Искусствд дурна өгсн бичкдүдт цаһан хаалһ дурджана. Светлана Батыреван келсәр, энүнд Рокчинский көдлжәсн цагнь үзүлгджәнә. Сурһульчнрин үүдәврмүд әдл биш, эврә чинртә. Директорин келсәр, һәәхүл секлһнә көдлмшт сурһульчнр шунмһа кевәр орлцв. Һәәхүлд сән белдвр кегдв. Энүнд нурһлж зургуд тәвгдв. Бичкдүдин хәләц һәәхүл хәләсн улсин зүрк авлх зөвтә.

Бичкдүдин школын сурһульчнр эврәннь үүдәврмүдтән зурачин дүр үзүлв. Эдн иим кевәр алдр зурачиг үзжәнә. Ода деерән эднә көдлмшт дуту-дундс бәәв чигн, иргчдән эднәс йоста зурачнр болхнь лавта.

Ээнән Делгр, Очра Сергей