Хотл балһсна хөрн тавдгч садт эврә бассейн бәәнә

Ода Элстин зәрм бичкдүдин садмудт ясврин көдлмш кегджәнә. Энүнд оржах бичкдүд талдан садмудт йовулгдв. Хотл балһсна хөрн тавдгч сад ясвр кеһәд төгсәв. Энд көвүд-күүкдт цуг таал бүрдәгдж. Нег үлү, догшн халун өдрмүдт энд эврә бассейн көдлжәнә. Бичкн көвүд-күүкд серүн уснд өөмәд, сергнә.

Арвн хойр сарин эргцд Элст балһсна садын көвүд — күүкд өөмлһнә бассейнд орад цогц махмудан батрулна, цаган соньн кевәр давулна. Цаган соньн кевәр давулсн деерән бичкдүдин эрүл менднь сән болна. Эдн бүкл жилдән гемтхш. Эмчнрин болн шишлн специалистнрин тоолврар нурһна гемәр гемтсн бичкдүдт болн бөдүн улст өдр болһн уснд орад өөмх кергтә. Болв уснд өрхин өмн бичкдүд тренер Цеднә Любовьла хамдан гимнастик кенә. Цогц махмудан халулсна хөөн бичкдүд уснд орна, эдниг тасрхан уга сурһмжлачнр, медицинск эгч болн олн жилдән эдн көдлжәх ээж Кишенкән Валентина хәләнә.

Жил болһн эн бичкдүдин садт хойр зун һучн тавн бичкдүд орна, арвн негн групп бәәнә. Эдниг хөрн дөрвн сурһмжлач хәләнә. Садын сурһмжлачнр өдр болһн усна чинрин тускар шишнлт кенә, дәкәд эврәннь бичкдүдин төлә олн зүсн керг үүлдврмүд бүрдәж давулна. Олн зүсн маарһас уснд чигн болна. Бичкн цагасн бичкдүд уснас әәлгон, өөмх дасна. Цааранднь өсхләрн эднә бәәдл жирһлд эннь кергтә болх, олн улст чигн дөн тусан күргж чадх.

Аджин Светлана, Хулхачин Николай