Хог-бог асхсн һазр дегд олн болжана
Давсн үвләр цасн баһ болад, эргндк аһу бузрдснь ил үзгднә. Энд-тенд пластикин шилмүд, картон, цаасн болн талдан чигн хог-бог хотл балһсна уульнцд болн хаалһсин хажуд овалһата. Экологудын келсәр, хог-бог хайсн улсиг олж авхд күнд болна.
Йиртмжин көрнгин болн эргндк аһу харлһна министерствин көдләчнр шинкн Элст балһснас һарч йовхла, хотл балһсна деед үзгт овалһата дала хог-бог бәәснь үзв. Эднә келсәр, эргндк гермүдин эздүд иим һазрт хог-бог асхшго бәәрнд бәәцин дала хог-бог асхад, һазр бузрдаж. Лола поселкд ормж ирнс кемд автомобильн хаалһин хажуд бас иим бәәдл тогтв. Энүнә дару министерствин специалистнр Ик-Буурла района Орһахн селәнд одв. Энд Мира нертә, Цикугиновин болн Адуичевин нертә уульнцд тосхлтын материалмуд, урһа модна бүчр овалһата бәәнә. Герин эзн күүкд күн Вера Бадмаеван цәәлһсәр, герт ясвр кесн хөөн иим дала хог-бог цуглрв. Удл уга зөөж һарһх зура бәәнә, машин уга болад зөөж һарһдг арһ уга болв гиж эн күүкд күн келнә.
Давсн жилд йиртмжин көрнгин министерствин специалистнр Ик-Буурла района аһуд зөвшәл угаһар хог-бог асхсн йисн бәәр илткв. Тиигхд һардачнр ялд унв. Хог-бог зөөж һарһх кергиг бәәрн муниципалитетмуд күцәх зөвтә. Эн саамд министерствин специалистнр иим хог-богин тускар селәнә муниципальн бүрдәцин ахлачнрт зәнглв. Келхд, иим рейдын йовудт урднь илтксн зөвшәл угаһар хог-бог асхсн һазр дәкнәс бүрткж хәләлһнә көдлмш кегднә. Нидн жил бидн тана поселк ирж хәләсн биләвидн. Энд овалһата хог-бог дала билә. Энүнә тускар административн протокол бичдглә.
Иим рейдын йовудт экологуд зөвшәл угаһар тосхлтын материалмуд, картон, пластик болн талдан чсигн хог-бог асхсн кесг һазр илткж авна. Иим рейдын ашт зака эвдсн улс илткж авгдх зөвтә. Болв эднә келсәр, иим кеәвр зака эвдсн улсиг олж авхд күнд болна.
Йиртмжин министерствин әнгин ахлач Евгения Пандинован келсәр, әмтн цуг хог-боган авч ирж асхна. Тер тоод әәмшгтә бог бас асхна. Эдн һазрт ивтрәд, хорлтан күргжәнә. Нег үлү хог-бог шатхла хорта утан һарна. Эргднц аһу бузрдажана. Тер мет энүнд хулһн болн талдан чигн хорлтан күрдг хортн дала. Иим зака вэдсн улс арвн-һучн минһн арлснг ял өгх зөвтә. Юридическ әмтн зун минһнәм авн хойр зун тәвн минһн арлснг ялд унх закан бәәнә. Селәнә ахалчнр эннь ик ял болжана.
Хату болн тосхлтын материалмудыг зөөж һарһдг бәәрг уга гиж зәрм әмтн келнә. Тегәд чигн хог-бог энд-тенд асхад, һазр бузрдажана. Эн туст хог-бог асхдг шишлнг полигон кергтә. Зуг энүг тосххин төлә ик мөнгн кергтә болжана. Тегәд эн төр мана танһчд хурц төрт хүврснь ил медгджәнә.
Ээнән Ольга, Бадмаран Владислав
