Хаврин байрт нерәдгдсн буйнч седклин концерт болв

Энүнә өмн өдр баһ тетквртә өрк-бүлмүдин бичкдүдин төлә Цаһан сарин байрт нерәдгдсн буйнч седклин концерт болв.

Буйнч седклин концерт хәләхәр ирсн арвн һурвн наста Настя Абушинован келсәр, Цаһан Сарин байр эднә өрк-бүлд хамгин дурта байр. Байрин ширә эргәд суусн көгшдүд болн бичкдүд хоорндан бүлән күр-күүндвр кенә. Медәтнр олн-зүсн домг, тууль болн йөрәлмүд келж өгнә. Настя Абушинован келсәр, гиич ирхлә, үвләс яһж һарвт гиж сурх кергтә. Эн жил үвлиг сәәнәр дааж һарв.

Концерт хәләхин төлә дөчн тавн көвүн-күүкнгд үрвр кегдв. Эдн цугтан олн-зүсн наста, олн-үзсн шажнд шүтнә. Цаһан Сарин байр эдниг цугтаһинь негдүлв. Ааюна Эрдниеван келсәр, ээжтәһән эн өдр хурлд одна, байрин өмн боорцг жил болһн болһна. Цаһана байрт олн-зүсн зүсн боорцг кедг авьяс бәәнә, тер толд хальмг улсин өскж йовсн темә дуралһад кенә, целвг, шовуд дуоасн боорцг бәәнә.

Цаһан сарин байр — хаврин эклцин темдг, әмтә тоот шинжрж цеврлһнә темдг болжана. Эн өдр өрк-бүл болһнд хамгин сән хот-хол кенә. Байрин ширәг герин эзн күүкд күн асхн ора күртл хураж авхш. Эн өдр хам-хоша бәәх улс, өөрхн элгн-садн, нәәжнр гиичд ирнә. Ирсн күн болһниг халун хотар тооһад һарһх зөвтә. Өрүн эрт олн деедс бурхндан халун хотын дееж тәвж өргц кедг авьяс бәәнә.

Бичкдүдт белг өгнә. Баһ тетквртә өрк-бүлмүдин бичкддүт әмтәхн хот-хоолар тоогдв. Хальмгин олн-әмтнә хуралын аппаратын һардач Саглр Баканован келсәр, иим байр мана өвкнрин уул авяьс зангшал хадһлжах йовдл болжана. Тер тоод өрк-бүл болһнд хальмгуд эврәннь келәрн күүндх зөвтә.

Цаһан Сарин байр шажна чинртә. Эн байр хальмг улсин харул-хааһул болгч Окн Тенгрлә залһлдата. Эн өдр олн әмтн болн гелнгүд маань умшад, Окн Тенгрин евәлд зальврна. Байрин өдр хальмгуд шин хувц өмсәд, гер дотркан цеврлж ахулдг йоста. Бүкл сарин эргцд әмтн килнц һарһлго, цевр-цер бәәх зөвтә.

Цаһан Сарин байрин өдр үвлин киитнд көрсн һазр девтәд, зурмн һарна. Эннь хавр ирснә ил темдг болжана.

Ээнән Делгр, Настан Сергей