Хальмгин университетд баһ наста номтнр бичкн предприятьмуд секжәнә
Хальмгин университетд оютнр эврә кергән секжәнә. Негдгч курсас авн баһчуд номин шинжлт кеһәд, хоршасн медрлән болн дамшлтан бичкн предприятьдан олзлжана. Эднә зәрмнь шишлнг иткүлин цаас авсн бәәнә.
Ода Хальмгин университетд эврә бизнесин ниицән бәәнә. Эн баһчуд баһ предприятьмудын эздүд болжана. Энүнә туск иткүлин цаас эднд шин жилин өмн өргнд бәрүлж өгв. Сергей Настаевин келсәр, баһ наста номтнр номин шинжлтд шунмһа кеәвр орлцсн төләд иим арһ учрв. Нарна күчәр ус һарһж авлһна төсвиг Настаев кесг жилдән күцәв. Цуг күн-түрүг дааһад, баһ наста номт күцлдән күрв.
“У.М.Н.И.К” нертә марһана дииләч Сергей Настаевин келсәр, нарна күчәр ус һарһж авдг эв-арһ мал өклһнд туста болх. Электрокүч әрвлнә. Экологин халхар әәмшг уга. Энүнд машина тосн-түлән олзлгдхш.
Тер мет баһ предприятин эзнә иткүлин цаасн Владимир Батыревд болн Бат Каруевд бәрүлж өггдв. Шинжлтын көдлмшиг негдгч курсас авн эклв. Ямаран төрәр шинжлт кехин тускар эднд деед сурһулин номтнр селвг өгв. Эднд цаарандан чигн баһчудт дөн болж.
Хальмгин университетд кегдсн хамгин сән шинжлтсиг бәәдл-жирһлд тохрах шиидвр авгдв. Баһ наста номтнрин хамгин сән көдлмш мана танһчд болн Әрәсәд болсн олн-зүсн марһаст орлцв. Хальмгин университетин әнгин ахлач, биологин номин кандидат Рамазан Файзиевин келсәр, ода деед сурһульд олн баһ предприять секх зура тәвгджәнә. Энүнд баһчуд арһлачин керг дасх. Баһ наста номтнр медрлән олзлад, эврә кергән эклж чадхмн. Эннь деед сурһульд шин көдлмш болжана. Баһчуд университет төгсәчкәд, көдлмштә болх.
Проректор Эльза Мантаеван келсәр, эндр өдрт дөрвн инновационн баһ предприять тогтагдв. Эднә тооог кесг холванд икдүлх зура университет батлж авла. "У.М.Н.И.К" нертә программар оютнр болн баһ наста номтнр белдсн номин зун найн төсвәс баһ предприятьмудын делгрлтд дөн күргдг санг найн тавн төсвиг мөнгәр дөннв. Эврәннь үүлдврт коммерцин чинр зүүлһхин төлә Хальмгин университет бат ишкдл кежәнә. Эльза Мантаеван келсәр, өдгә цагин таалд иим зөрүлт ик чинр зүүж, талдан көдлмшлә әдл нүүрлгч орм эзлжәнә. Танһчин деед сурһулин иим үүлдвр мана региона экономическ делгрлтд болн арһлачнрин көдлмшт сән нилчән күргхмн. Проректор Эльза Мантаеван келсәр, иргчдән дәкәд иим һучн предприять тогтах зура бәәнә. Баһчуд эврәннь продукцан хулдж чадх. Жил ирвәс эн керг делгрлт авх зөвтә. Баһ наста номтнр болн оютнр шин эв-арһ үүдәж көдлмштән олзлж чаджана.
Әрәсән деед сурһульд арһлачнрин үүлдвр шин халх болжана. Хальмгин университетд иим көдлмш делгрлт авчана. Энүнд кесг жилдән үүлджәх лабораторьмуд болн цутхлнгуд сән дөн болжана. Эднә то өссн деерән, материальн-техническ ул бас шинрүлгджәнә.
Чучян Валентина, Очра Сергей
