Хальмгин радио шин эв-арһар көдлжәнә

Эн жил Хальмгин радио зәнглһнә һарциг олн улст соньн кевәр күргж медүлхин төлә ик көдлмш күцәв. Тер мет иим һарцин кемжән икдв. Федеральн шин зәнгс эфирт һарсн хөөн Әрәсән радиоһар орс келәр Вести-Калмыкия программин шин зәнг сонсж болх. Тегәд өрүнә болн өдрин һарцас сонсачнр Әрәсәд болн Хальмг танһчд учрсн йовдлмудын тускар медж чаджана. Асхлад болхла эфирт зуг шин зәнгсин һарц һарчана. Тер мет радио сонсдг улсин то өсжәнә. Ода Әрәсән радио машиндан йовж йовад сонсж болх.

“Калмыкия” ГТРК-н танһчин радиопрограмм Әрәсән радион каналд һарна. Эфирин цуг кемжәнәс Хальмгин филиал хойр частан эфирт һарна. Эннь орс болн хальмг келәр шин зәнгсин һарц, хурц төрмүдәр шуд эфирт күүндвр болна. Энүнд йосна элчнр болн соньн улс ирж ухан-тоолврарн хувалцна. “Калмыкия” ГТРК-н радиозәнглһнә церглтин һардачнрин тоолврар, ода радиопрограммин региональн сонсхврмуд соньн болв.

Радиозәнглһнә церглтин шеф-редактор Галина Джамбинован келсәр, ода федеральн шин зәнгсин хөөн региональн һарц эфирт һарна. Энүнд радиосонсачнр дасад, мадниг сонсна. Ода танһчин әмтн Әрәсәд болн хальмг танһчд учрсн йовдлмудын тускар сәәнәр медж авдг болв. Урднь өдрә болн асхни һарц ахр болдг билә, ода энүнә цаг хойр холванд өсв. Хальмг келәр шин зәнг нәәмн минутд һардг болв.

Әрәсән радион каналд Хальмг танһчд эврәннь сонсхврмудан ахр болн дунд дольганд эс гиж сунһугин каналд мана региона цуг аһуд күргнә. Тер мет радио сонсдг улсин то жил ирвсә өсәд йовна. Ода машинд йовх әмтн АМ диапазонд радиоприемникан орулад, 846 килогерцин дольганд Хальмгин радио сонсж чадх. Тер мет Ростовск областин болн Ставропольск крайин бәәрн улс танһчин райдион сонсхврмуд сонсж чаджана. Ода Хальмгин радио танһчин цуг аһуд сонсх арһ учрв. Танһчин радион сонсхврмудыг олн улс сонсж, редакцур бичг бичнә, телефоһар жиннүлнә.

Эн залу күүнә келсәр, цаг бәәхлә райдио сонсхадн дурта. Шин зәнгс болн талдан чигн сонсхвр соньн болна. Эн күүкнә келсәр, мана танһчд учрсн йовдлмудын тускар радион шин зәнгсәс медж авна.

Редактормудын тодлсар, нег дәкж Венгряс бичг ирв. Көдлмшин кергәр талдан орн-нутгт бәәсн кемд бичкдүд орлцата хальмг келмәр радиосонсхвр сонсж чадв. Ода Хальмгин райдион коллективд өөдән дамшлтта болн көдлмшән сәәнәр меддг улс көдлжәнә. Эдн ахр болзгт ик көдлмш күцәж чадна. Радион журналистнр зәнглһнә болн тематическ программ белдсн деерән, эврәннь сонсхврмудын монтаж кенә. Гиляна Джиджикова зуг нәәмн сардан көдлжәнә. Эн цагин эргцд көдлмшин сән дамшлт хоршаж чадв. Ик кезәнәс авн санжасн күцл ода күцв гиж Гиляна келнә.

Хальмгин радион зәнгч Гиляна Джиджикован келсәр, көдлмш йир икәр таасгджана. Мана танһчин баһчуд тас талдан болв. Эдн өмнән күцл тәвжәнә. Эднлә харһад күүндхд соньн болна.

Танһчин радиосонсачнр журналист Мария Зулаеваг сәәнәр меднә. Энүнә келсәр, әмтнд соньн һарц белдхәр шуж көдлжәнә. райдион журналист өдр болһн эврәннь дамшлтан өөдлүлх зөвтә. Эс гиж сонсхврмуд соньн болшго.

Райдион эн хорад күн болюн орж чадшго. Энд давсн зун жилин һучдгч жилмүдин өвәрц архивн материал хадһлгджана. Ода энүнә көрнгд һурвн минһн материал бәәнә. Тер тоод тәвн доладгч жилж цугсоюзн радиоһар дуулсн “Агчин улан бетк” нертә хуучн дун архивд үлдв. Тиигхд хальмгуд төрскн һазртан шинкн хәрж иржәсн цаг билә. Эн ду радиоһар сонсчкад медәтә улсин нүднәс нульмсн асхрв. Звукорежиссер Савр Манджиевин келсәр, тер мет танһчин нертә шүлгчнр, зурачнр болн талдан чигн нертә үүлдәчнр орлцата материалмуд хадһлж чадв.

Өдр болһн хальмгин радио эфирт хойр частан һарна. Энн дегд ик дала цаг биш. Болв энүг белдхин төлә журналистн звукорежиссермуд болн редактормуд асхн ора күртл көдлнә.

Ээнән Ольга, Мятежный Максим