Хальмгин Ик сурһульд йилһән сәәнәр сурһулян сурсн оютнриг йөрәв

Хальмгин Ик сурһульд йилһән сәәнәр сурһулян сурсн оютнриг йөрәв. Эднә тоод 6З күн эн жилд Ик сурһулян чиләжәнә. Келхд, эн оютнрин тоод 9 күн 5 жилин туршарт зуг тавн гидг темдгәр сурһулян сурла. Дигтә эднд 15 минһн арслн мөнгнә мөрә бәрүлж өгв.

Жил болһн сурһулин чилгчәр Хальмгин университетд йилһән сәәнәр сурсн оютнриг ачлна. Баһчудыг йөрәһәд, белгүд болн мөнгнә мөрә бәрүлж өгнә. Багшнрин келсәр, тиим йовдл оютнрт урмд өгнә.

Хальмгин болн дорд үзгин филологин институтын тавдгч курсин оютн Нәдвдә Занда эн жил ик сурһулян чиләжәнә. Удл уга күүкн улан диплом авх. Занда цааранднь аспирантурт сурһуль сурх саната.

Баһчудыг йөрәхәр эднә багшнр, өөрхн элгн-саднь, үүрмүднь болн эрдм-сурһулин министерствин көдләчнр ирв. Эн көвүд-күүкд тавн жилин эргцд сурһулян сәәнәр сурад, кесг номин конференцд, сойлын керг-үүлдврт болн спортын марһаст орлцла. Нег үлү эдн цуг әрәсән олимпиадт орлцад, хальмг университетин нер туурулж йовла.

Байрин керг-үүлдврт мана университетин “Бумбин орн” нертә ансамблин орлцачнр билг-эрдмән үзүләд, ирсн улсиг байрлулв. Эн харһлт оютнрт йоста нәр болж медгдв. Эдн нег-негән йөрәһәд, багшнртан болн эк-эцктнртән ханлтан өргв. Июнь сарин чилгчәр болхла, дигтә эн көвүд-күүкд улан дипломан авх.

Шаран Баира, Очра Сергей