11 мая 2012, 17:28
Хальмгин хотл балһснд 14-гч Цугәрәсән тохма хөөдин һәәхүл давхмн
Хальмгин хотл балһснд май сарин 21-с авн 25 күртл тооһарн 14-гч Цугәрәсән тохма хөөдин һәәхүл давхмн. Эн жил һәәхүлд зуг хуцмуд биш хөд чигн орулгдж, эднә чанһ-чииргнь йилһгдхмн. Мана танһчин нериг эн һәәхүлд тохма мал өскдг эдл-ахус орлцж харсхмн. Энүнәс нань кирһәчнрин марһан, сән тохма малмудин аукцион, хөд хәрүлдг нохасин көдлмш, мөрдин урлдан, келн-әмтнә билг-эрдмин марһас давхмн. Дәкәд болхла һәәхүлин йовудт келн-әмтнә хөөчнрин ниицәнә сүүр болхмн. 2012-14гч жилмүдт хөд болн ямас өсклһнә программ делгрүллһнә төрәр төгрг ширә давхмн.
