Хальмгин хойр школ Әрәсән хамгин сән заведеня тоод орв
Әрәсән хамгин сән гисн школмудын тоод Хальмг танһчин эрдм-сурһулин хойр учреждень орв. Эннь Элстин лицей болн Цаһан Амн селәнә гимназь. Хамгин әсн школ шүүж авсн цагт ЕГЭ-н аш, олимпиадт сурһульчнрин күцәмж болн сүл һурвн жилин медрл тоод авгдв.
Эн көвүд — күүкд лицеистин нерән эврәннь күч-көлсәрн иткүлв. Йилһән сәәнәр сурһулян дасад, гүн медләрн эврәннь сурһулин заведеня чинринь өөдлүлв. Лицейин сурһульчнр олн-зүсн цугәрәсән олимпиадмудын дииләчнрин болн призермудын тоод орна. Эднә келсәр, хотл балһсна хамгин сән школд сурчасндан ик бахмжта бәәнә. Нааран орж сурхин өмн эдн чанһ шүүвр дааж һарв. Ода Әрәсән хамгин сән деед сурһуль лицеистнриг дурлж сурһульд авчана.
Эн көвүнә келсәр, лицейд өгсн медрл талдан школмудас ик болн гүн. Тегәд энд авсн медрл деед сурһульд сән нилчән күргх. Күүкнә келсәр, туужин кичәлмүдт йир соньн болна. Зарһин сүүр яһж болдгинь медж авна, олн-зүсн күр-күүндврин йовудт келнә билгин дамшлт авна.
Лицеин багшнр болхла цугтан өөдән мергжлттә болн ик дамшлтта специалистнр. Кичәлд көвүд-күүкд эврәннь ухан-тоолвран медүлж чадна. Эннь сурһульчнрт таасгджана. Зәрмдән көвүд-күүкдин ухан-тоолвр багшин ухан-сананла ирлцхш. Кичләд авсн медрлән эдн дамшлтын даалһврар батрулна. Эднә келсәр, иим кевәр материал дасж авхд амр болна. Светлана Шевенован сурһульчнр олн-зүсн олимпиадмудт оньдин сән күцәмж бәрж ирнә. Эврәннь көдлмштән дурта болхла, седклән өгәд көдлхлә иим үзмж ирх зөвтә гиж дамшлтта багш келнә.
Лицейин туужин багш Светлана Шевенован келсәр, сурһульч кичәл болһнд ик көдлмш күцәх зөвтә. Тиигхлә гүн медрл авх. Багш болхла эдниг кергтә жимд орулх зөвтә. Энтн йоста тренерин көдлмшлә әдл болна.
Элстин лицей Әрәсән хамгин сән гисн тавн зун школын тоод орсн йовдл учрежеденя сән күцәмж болсн деерән, танһчин эрдм-сурһулин системин ик күцәмж болж һарчана. Мана орн-нутгин хамгин сән школмудын тоо орхин төлә ЕГЭ-н шүүврин аш, эн жил сурһльчнрин цугәрәсән олимпиадт бәрсн күцәмж болн сүл һурвн жилд цугәрәсән олимпиадын товчлгч девснгд орсн дииләч эс гиж призер бәәхнь тоод авгдв.
Лицейин директор Татьяна Питкееван келсәр, Элстин лицей цугәрәсән олн-зүсн программд орлцна. Энүнә нилчәр хоршасн дамшлтарн хувалцх арһ учрна, багшнр болнс урһульчнр иим программд орлцад эврән сән дамшлт бас хоршаж авчана.
Элстин лицей иим сән үзмж бәрсндән зогсхар бәәхш. Эдн оньдин нүүрт һарад дасчкв. Иргчдән Әрәсән хамгин сән гисн хөрн тавн школын тоод орх күцл эдн өмнән тәвжәнә.
Ээнән Ольга, Котина Валерий
