Хальмгин дүрслгч искусствин үүлдәчнрин үүдәврмүдин һәәхүл секгдв
Пальмовин нертә келн-улсин музейд Хальмгин дүрслгч искусствин алдр үүлдәчнр нертә һәәхүл секгдв. Соньн шин һәәхүл Элст балһсна искусствин эрдмд дурта улсин болн мана танһчин гиичнрин оньг авлх.
Һәәхүлд ут-тоодан арвн тавн зурачин зун көдлмш үзж болх. Энүнд жирдгч-далдгч жилмүдт үүдхсн көдлмш һәәхж болхмн. Шин һәәхүлд дүрслгч искусствин олн-үзсн үүдәврмүд, тер тоод зургуд, графикин көдлмш, скульптур, урн һарин кегдлмүд, күүнә зургудӘ йиртмж болн талдан чигн үүдәврмүд үзж болжана.
Тер мет һәәхүлд ирсн әмтн Пелагея Емчигирован олн-әмтнә үүдәлтлә өөрхн таньлдх арһ учрв. Эн үүлдәч хальмгшин краеведческ музейин художественн әнг бүрдәлһнд шунмһа кеәвр орлцсмн. Һәәхүлд зурачин үүдәсн “Автопортрет” нертә зург үзж болх. Хальмгин нертә үүлдәч, Әрәсән олн-әмтнә зурач Һәрә Рокчинскийн зурсн “Сказ о Монголии” нертә зург олн улсин нүд авлна. Энүнд хальмгуд эврәннь өвкнриннь төрскн һазр — Зүнһарин хотхрин тускар гейүрдж санжах ухан-санан медүлгджәнә. Һәәхүлд Ольдаевин, Сычевин зурсн ке-сәәхн натюрмортмуд хальмг улсин бәәцин тускар келж өгчәнә.
Зурач Николай Галушкина келсәр, иим һәәхлү секгдснь ик байр үүдәжәнә. Художественн училишд сурчасн кемд танһчин нертә зурачнрла Рокчинскийла, Ольдаевла болн талдан чигн билгтә үүдләчнрлә харһад күүндх саам учрла. Шин һәәхәүлд эврәннь сурһульчнран дахулад ирв. Баһчуд Хальмгин нертә зурачнриг медх зөвтә.
Зург зурлһна эрдмәр соньмсжах улс Рокчинскийн, Ольдаевин, Кикеевин үүдәлтиг сәәнәр меднә. Һәәхүлин бүрдәһәчнрин келсәр, хамгин түрүнд шин һәәхүл хальмгин дүрслгч искусствин алдр үлдәчнрт нерәдгдв. Энүг хәләхәр искусствин училишин оютнр ирв. Иим өвәрц туужин халхар медрл өгдг көдлмшиг музейин көдләчнрәс нань күн хәләһәд уга. Тегәд баһчуд эврәннь нүдәрн билгтә танһчин зурачнрин үүдәврмүдиг хәләж чадв. Эн күүкнә келсәр, нурһлж йиртмжин зургуд таасгдна. Эн һәәхүл йир соньн. Эврәннь нүдәрн хальмгин алдр зурачнрин үүдәврмүд үзж чадв.
Хальмгин дүрслгч искусствин алдр үүлдәчнрин һәәхүлд ирсн күн болһн бийдән шин байр үүдәгч медрл авч чадв, хальмгин байн туужла өөрхн таньлдв.
Ээнән Делгр, Колдан Церн
