Хальмгин ачта багш Санж Кензеевин санл тодлгдв
Амр Санана нертә келн-улсин библиотект хальмг танһчин ачта багш Санж Кензеевин зун жилин өөнд нерәдгдсн санлын асхн болв. Йоста багш, төрскн келндән болн сойлдан хару, һольшг зангта болн цаһан седклтә күн билә гиж энүнә сурһульчнрнь болн хамдан көдлж йовсн улс Санж Алексеевич Кензеевиг тодлна.
Эн күн адрута жирһлин хаалһар йовсмн. Бичкндән дегд эрт эк-эцк уга үлдәд, өнчрв, даарад, харнх саам учрв, дәәнә догшн зальд орв, шавтад инвалид болв, киитн Сиврт туугдв. Күзүцә зовлнг дааж һарсн Санж Кензеевин зангнь батрад, цогцнь болд мет чан-чиирг болв. Бичкнәсн авн чик сурһмж авда, шагшавдын чинрән геесн уга. Тегәд чигн һольшг жөөлн зангта багшдан оютнр болн хамдан көдлжәсн улс дурта бәәсмн. Билгтә номт Санж Кензеев дорас өсж баһчудт гүн медрл өгәд, энүнә кергиг эдн цаарандан делгрүлв. Эднәс кесгнь танючин номин болн сойлын нертә үүлдәчнр болж һарв.
Санж Алексеевич насни туршарт хальмг улсин оюни зөөриг тархалһна кергт арһ-чидлән агсж көдлж йовсмн. Сиврт тууврт бәәсн цагт Алтайск крайд экләд багшлв. Тер цагт багшин эрдмән сәәнәр меддг күн гиж бийән үзүлв. Болв хол һазрт у-өргн теегән санад, төрскн келнә босхмжин төлә шунмһа үүлдвр күцәж йовла. Хальмгуд төрскн һазртан хәрж ирх зәнгиг ик байртаһар тосв. Нег минһн йисн зун жирдгч жилд Элст балһсна педагогическ училишин директорт шиидгдв.
Номт Санж Кензеев эврәннь үйнртән оюни байн зөөр үлдәсмн. Тоомсрта багш болсн деерән, хальмг келнә учебникүдин зокьялч болв, байн дамшлтта методист болад, багшнрт ик дөн болв. Нерән туурулхин төләд биш, эврәннь келн-улстан церглхин төлә шунж йовсн күн.
Санж Алексеевичд амр биш номтын үүлдвртнь болн багшин көдлмштнь өрк-бүлнь сән дөн болсмн. Энүнә авальнь Надежда Садиевна бас багшлж йовла. Эврәннь авальдан нөкд болад, дөн-түшг болж йовсмн. Эдн хамдан дөрвн үрән өскәд кү кев. Үрдүднь эк-эцкән дураһад, хальмг келндән хару йир дурта улс болж өсв.
Орсин туужин номт Василий Ключевскийн келсәр, сән багш болхин төләд заажасн предметан дурлх кергтә, сурһульчнран дурлх кергтә болжана. Иим кевәр Хальмг танһчин ачта багш Санж Кензеев чидлән нөөлго көдлж йовсмн.
Елена Алексенко, Котина Валерий
