Хальмг Танһчин багшнр ЮФО-д соньн программ үзүлв
Хальмг Танһчин багшнр «За нравственный подвиг учителя» нертә цугәрәсән марһана дииләчнрин тоод орв. Эдн «Мирная радуга семи “Я» нертә программиг жюрин гешүдт үзүлв. Удл уга 21гч тойгта школын багшнр Москва балһснд болх марһана дииләчнрин харһлтд орлцх.
Багш Ольга Перепелятникова марһана программин зокьялчнь негнь. Энүг белдхин төлә кесг цаг кергтә болв гиж багш келнә. Энүнә тоолврар, школмудын багшнрин болн сурһмжлачнрин һол күцлнь сурһульчнрт болн садын сурһмжлачнрт медрл өглһн болн цаһан седклин, төрскнч болн шагшавдын сурһмж бичкдүдт болн баһчудт өгх кергтә Элстин хөрн негдгч тойгта школын эклц классин багш Ольга Перепелятникован келсәр, оюни болн шагшавдын сурһмж хамгин һол төр болв. Энүнә дөнгәр бичкдүд эврә тоолврта болна.
“Мирная радуга семи “Я” нертә хамцу көдлмш Әрәсән Өмн үзгин иим дөрлдәнә хойрдгч девснгд орж чадв. Хөөннь товчлгч марһанд орлцад, хамгин сән программин тоод орв. Багшнрин келсәр, иим марһана йовудт эрдм-сурһулин көдләчнр бичкдүдт оюни болн шагшавдын сурһуль болн сурһмж өглһнә дамшлтыг ашлж болв. Эрдм-сурһулин үүлдврин үүлджәх дамшлтын то-дигин ул тогтаж болв. Күцәмжин солнг бичкдүдт наадар дамжулад, олн-зүсн предметмүд дасхд сән нилчән күргнә. Багш Ольга Усунцынован келсәр, бичкдүд иим программиг йир сәәнәр меднә. Эклц классин багш Ирина Головченко темдглсәр, өдгәц агт эн төр ик чинр зүүжәнә. Иим төсвиг эврәннь класстан багш болһн олзлж чадх.
Онц келхд, марһана һол күцлнь — багшнрин болн сурһмжлачнрин үүдәлтд урмд өглһн, оюни болн шагшавдын зөөрлә бичкдүдиг таньлдулһн болжана. РИПКРО-н ректор Лилия Мунчинован келсәр, Өмн үзгин федеральн округд болсн марһанд Хальмг танһчин нер харссн багшнрт институтын специалистнр методическ дөн күргв. Хальмг танһчин эрдм-сурһулин көдләчнрин мергжлт өөдлүлһнә институтын ректор Лилия Мунчинован келсәр, багшнр эврәннь көдлмшән сәәнәр белдх зөвтә бәәсмн. Оюни болн шагшавдын сурһмж өглһнд эн программ йир сән.
Программин зокьялчнр ачлврмуд болн диплом авцхав. Сурһульчнрт оюни болн шагшавдын сурһмж өглһнә төлә көдлжәх багшнрт сән урмд өгхнь лавта. Келхд, эн төрт ода мана танһчд ик оньг өггджәнә. Хальмг танһчин багшнр товчлгч марһанд бас сән үзмж бәрәд, удл уга Москва балһснд болх жил болһн болдг рождественск умшлһнд орлцх зөв авв гиж эндр медгдв.
Ээнән Делгр, Колдан Церн
