Хальмг танһчд «Үвлә заһс анһлһ» профилактическ эв-арһин түрүн девснг эклсмн
Мана региона межәд «Үвлә заһс анһлһ» — нерәдлһтә профилактическ эв-арһин түрүн девснг эклсн бәәнә. Намрин-үвлә цагт усн деер йовх әмтнә эрүл-менд харлһна төрәр МЧС-ин көдләчнр сурһулин заведеньсар лекцс умшч, цәәлһврин көдлмш давулхмн. Энүнә йовудт бәәрн әмтнлә бас цәәлһврин көдлмш кегдхмн. Үвлә цагт заһс бәрдг улсин то-диг бичгдж диглгдхмн. Әәмшгтә һазрмуд харлһнд авгдхмн. Операцин һол төрнь болхла — усн деер учрдг зеткртә йовдл баһруллһн болжана.
Үвләр, усн сәәнәр көрәд уга цагт заһсн икәр хурдгиг меддг заһсчнр тер дарунь анһучлх арһ хәәнә. Мөсн 7 сантиметрт көрсн цагт мөсн деер һарч болхмн, заһсчнр болхла мөсн З-5 сантиметрт көрсн цагт һарад биидән әәмшг учрана гиж З-гч участкин ах государственн инспектор Сергей Казимиров келнә. Тер цагт эдн мөсн деер анһучллһна эв-арһ хадһлл уга сөөд чигн , харслһна хувц-хунр угаһар чигн, зәрмнь нам соктуһар һарна гиж инспектор күүндврән цааранднь давулна. Эндр өдр күртл танһчар усна межәд зурһан күн әмнәсн хаһцсмн. Давсн жиллә дүнгцүлхлә эннь баһ болв иим йовдлас саг бәәх кергтә. Үвлин кемд харсачнрин көдлмш зөвәр икднә.
Уснд унсн, чивсн улсиг хәәхд зөвәр күнд болна. Давсн жил Канурка нертә нуурт хойр заһсч көлгтәһән хамдан уснд унсмн. Эдниг һарһж авхин кергт кесг эв-арһ олзлх кергтә болв гиж Әрәсән медлд ордг Хальмг танһчар бәәх МЧС-ин харслһна церглтин начальник Константин Сорокин келнә.
Үвлә заһс анһлһнд һарсн цагтан цуг диг-дара хадһлх кергтә. Диг-дарас күнд биш. Тер цагт заһсчнр эврәннь эрүл-мендән харжах улс болжана.
Ээнән Дельгр, Колдан Церн
