Хальмг танhд Нарт делкән өрк бүлин өдр темдглжәнә

Эндр цуг делкәд өрк бүлин өдр темдглнә. Күн болһна бәәдл жирһл өрк-бүләс авн эклнә. Олна бат нег әнгнь болжах өрк -бүлдән бидн авьясан, келән, сойл туужан хадһлнавидн, мана орн — нутгин, танһчин делгрлтин болн тогтурна бәәдлин тоотнь мана өрк бүл болжана. Хальмг Танһчд кесг талын келн улсин өрк -бүлмүд хоорндан ни — негн бәәнә.

Негдгч классин сурһульчнр Даниел болн Каро эврәннь өөрхн элгн садндан йир дурта. Өдр болһн эврәннь эк эцкән школд авсн авсн сән темдгүдәрн байрулна. Эндр өрк бүлин байрта өдрлә энкр экжән эцкдән школд дассн дууһан нерәдж дуулжана. Кнарик Саргсян көгжмин училишин сурһульч, эндр өдр эн билгтн хальмг танһчин толһачин мөрән лауреат болжана.

Бичкдүд дуулхларн эк эцкнь, ээжнь, бичкн Давид болн Петик көвүд оньган өгч дуулсн дууһинь сонсна. Эднә өрк бүлд бичкдүд йир билгтә: эдн зург зурна, ду дуулна, би чигн биилнә. Эврәннь авьяс заншалан сәәнәр меднә, эк эцкнр эднд дангин дөн нөкд болна.

Эндр өдр би цуг бурхдан зальврж ханлтан өргжәнәв тер юнгад гихлә мини өөрхн экм, авальмн, күүкдм эрүл менд, сурһулян сәәнәр сурч сән сәәхн бәәнә — гиж герин Армен Саргсян келв.

Армен эврәннь энкр Вардуи авальтаһан 17 жилдән хамдаан ни негн бәәнә.Жил ирвәя эднә өрк бүл батрад өсәд йовна. Эндр өдр олн үртә өрк бүлиг асрх йир күнд болна, тиим болв чигн өдр болһн әднә байрта чирәһинь үзхлә зовлн дарунь мартгдна. Өрк бүлд дурн иткл бәәхлә тиим өрк бүл көвүд күүкд хоорндан нег негән хәләж, тевчж өсх.

12 ач—зеетә, нег жичтә байн ээж Кнарик Гарегиновна эндр өдр эднән хәләһәд бәәнә.Элст балһснд эн медәт 1987 жиләс авн бәәнә. Ереванд бәәсн цуг элгн садан эн өдрлә халунар бас йөрәжәнә.

Эндр өдр би байрлжанав тер юнгад гихлә тиим байр цуг делкәд кергтә. Олн үртә өрк бүлмүд жил болһн олн болтха. Өрк бүлдән цугтан ни негн амулн эдлж бәәхлә орн нутг уралан девшж делгрнә.

Бевина Мерген, Бадмаран Владислав