Хальмг танһчд баһ болн дунд бизнес дөннлһнә муниципальн программс күцәлһнә төлә тавн сай арслнг йилһж өггдх
Хальмг танһчд баһ болн дунд бизнес дөннлһнә муниципальн программс күцәлһнә төлә тавн сай арслнг йилһж өггдх. Эднәс федеральн бюджетас дөрвн сай арслнг ирх, нег сай арслнг танһчин бюджет йилһж өгх. Ода арһлачнрин дунд марһан болжана. Энүнә ашар диилвр бәрсн арһлачнрт дөнцл мөнгн йилһж өггдхмн.
Өдгә цагт Хальмг танһчд көдлмш уга улсин то арвн дөрвн процентд күрв. Тегәд арһ уга көдлмг уга элстихн өрк-бүлән тежәхәр мөнг олзх арһ хәәжәнә. Ода зурһан минһн Элст балһсна әмтн бийннь төлә көдлжәнә. Арлһачнрин нилчәр государственн хазнд алвна мөнгн орж ирнә. Элст балһсна мэрийн толһачин дарук Боова Бадмаевин келсәр, ода хотл балһсна бюджетин далн процентнь алвнас тогтна. Иим алв олн арһлачнр орулж өгчәнә. Тегәд Элстин хазнд эннь сән ничлән күргжәнә.
Бюджетд алв орулж өгсн деерән онц арһлачнр кесг улсиг көдлмшәр теткжәнә. Ода бембя Максимовин пекарньд хөрн зурһан күн көдлжәнә. Бизнесиг эн күн сәәнәр меднә. Хөрн жил хооран эв. кергән эклсмн. Хойр минһн йисдгч жилд Бембя Церенович баһ болн дунд бизнес дөннлһнә программар тәвн минһн арслнг дөнцл мөнг авсмн. Эн мөнгәр кергтә оборудовань хулдж авла. Государств арһлачнрт нөкд болжхань сән керг гиж Максимов келнә. Зуг иим мөнгн шин эврә керг эклхд дегд бичкн болна. Арлһач Бембя Максимовин келсәр, кемр бизнес дегд ик биш болхла, шангас өгдг дөн сән болх. Болв йоста сән керг эклхин төлә государтсв өгдг мөнгнт юмнд күрхш.
Элст балһсна администрацин зәнглсәр, арһлачнрт нег дәкж өгдг дөнцл мөнгн цуг эклц дөн болжана. Арһлач болһн Элстин администрацд ирәд, кергтә цәәлһвр авч адх. Эврәннь кергән яһж секхин тускар олз-тус яһж шингәж авхин болн кергән яһж күцәхин тускар цәәлһвр энд өггднә. Элст балһсна мэрийн әнгин ахлач Татьяна Утинская келсәр, банкмудын көдләчнр орлцата төгрг ширән сүүр бүрдәж давулнавидн. Арһлачнр банкас өгнья мөнгн сән таалд авхин төлә бидн иим керг-үүлдвр күцәжәнәвидн. Тер мет хамцу нөкцлтин талдан чигн көдлмш күцәгджәнә.
Утинскаян тоолврар, эннь зуг түрүн ишкдл болжана. Удл уга баһ болн дунд бизнес дөннлһнә федералнь марһанд орлцх арһ учрх. Марһанд диилвр бәрсн арһлачнр дөрвн зун тәвн минһн арслнг дөнцл мөнг авч чадх.
Азыда Надежда, Бадмаран Владислав
