Госпожнадзорин көдләчнр сән өдрән темдглв
Государственн пожарн надзорин көдләчнр эврәннь сән өдрән темдглв. Олн-әмтнә эдл-ахуд түүмрәс әәмшг уга бәәлһнә керг-үүлдврмүд күцәлһнә болн бүртклһнә төр государственн пожарн надзорт даалһсн туужлгч цагас авн кесг жил болв. Сән өдрт нерәдгдсн байрин хургин йовудт эн халхин ветеранмуд болн нүүрлгч көдләчнр ачлгдв.
Түүмр шатдг һол учрнь — бешмүд олзлһна зокал эвдснәс көлтә, һалла саг эс бәәснәс болн зөрц һал өглһн болна. Түүмр шатлһан зеткртә йовдл баһар учрхин төләд государственн пожарн надзорин инспектормуд өдр болһн тавн-зурһан бүртклһ кенә. Эннь гетлүлгч көдлмш болжана. Эннь түүмрәс әәмшг уга бәәлһнә һол төр болжана. Байрин хургин йовудт нүүрлгч арвн көдләчд болн ведомствин хойр ветеранд күндлһнә һашгуд болн үнтә белгүд бәрүлж өггдв. Эн эрдмин көдләчнр улсин эрүл-менд харж, эдниг күнд түрү бәәдләс һарһж авна.
Хальмг танһчар МЧС-ин заллтин ахлачин дарук Олег Убушиевин келсәр, эднә ведомствд ах үйин көдләчнр байн дамшлтан баһчудт үлдәж өгнә. Ах үйнр эврәннь сүв-селвгәрн баһчудыг дөннәд, оньдин көдлмштнь нөкд болна.
Ветеранмуд дундас баһчудт үлгүр-үзмж болжахнь Тихон Чеканов. Тәвн дөрвдгч жилд СССР-ин МВД-н Харьковск пожарн-техническ училиш төгсәв. Тиигхд нег ормд марһанд йисн күн орад, училишд ордг бәәж. Тихон Чекановин келсәр, хөвтә күн бәәж. Сурһулин цагт тавн дәкж парадт орлцв. Дунд эрдмин сурһуль төгсәсн хөөн Ставропольск крайд көдлв. Хальмг танһчд ирж көдлснц агт эн ведомствд зуг һурвн күн көдлжәсн бәәж. Ветерана келсәр, эдн ведомств бүрдәлһнә ул тогтасмн.
Ветеран Тихон Чекановин келсәр, Элст балһснд болсн нег түүмр сәәнәр тодлна. Терүнд эврәннь әмән әрвллго нег кү харсж авч. Өдгә цагт эн халхар көдлжәх баһчуд эндү дуту-дунд һарһх зөв уга. Юнгад гихлә, эднә көдлмш талдан улсин жирллә өөрхн залһлдата. Күнд-түрү бәәдлд туссн улсиг харсж авх төр эднә хамгин һол керг болжана.
Вера авальтаһан эдн тәвн тавн жилдән хамдан бәәжәнә. Хойр үрән өскәд кү кев. Ода һурвн ач-зеетә. Хойр жиж-зеенчр бәәнә. Көвүнь — цергә офицер. Цергәс мордж ирәд ода пенсьт бәәнә. Йисн наста ач көвүһән Тихон Чеканов оданас авн церглтд белджәнә. Ачнь аавасн үлгүр авад бас эн эрдәмр сурһуль сурх саната. Ветерана цуг ахнр-дүүнр цергт церглсмн. Тихон Чеканов эврәннь дурта эрдмәрн дөчн нәәмн жилдән көдлв. Эднәс дөчн жилдән госпожнадзорин халхар көдлсмн. Эн цагин эргцд нег чигн дәкж шоодврла харһсн уга. Эн халхин көдләчнрин сән өдр полковник Чекановд онц темдгтә өдр болна.
Баһ дүүвр насндан Тихон Чеканов сул цагтан дегт умшхдан дурта билә гиж хамдан көдлж йовсн улс тодлна. Хамгин икәр детектив болн цергтә литератур дурлж умшдг бәәсмн. Тихон Чеканов государственн өөдән ачлврмудар ачлгдв, тер тоод арвн нәәмн медальта. Хамгин үнтә ачлврнь — олн-әмтнә Иньглтин цаһан мөнгн орден болжана. Эврәнно көдлмшән дурлх кергтә, нег үлү иим халхин көдләчнрин һарт талдан улсин жирһл бәәсн тускар баһчуд мартх зөв уга гиж ветеран Чеканов селвг өгчәнә.
Ээнән Делгр, Котина Валерий
