Городовиковск районд олн давхрта гермүдт ясвр кехин төлә мөнгн күртжәхш

Олн давхрта гермүдин капитальн ясвр урдк кевәр, ЖКХ-н халх шинрүлһнә сангин мөнгәр күцәгдхмн. Болв эн жиләс авн гермүдин эздүдин орулж өгх мөнгнә кемжән арвн тавн процентд өсв. Урднь эдн тавн процентинь орулж өгдг бәәсмн. Энүнә тускар эндр маднд жилишн-коммунальн эдл-ахун болн энергетикин региональн министерств зәнглв. Городовиковск районд тосхгднас авн капитальн ясвр кегдәд уга гермүд бәәнә. ЖКХ-н халх дөннлһнә төлә регионд мөнгн күртхий аль угай?

Интернациональная нертә уульнц шинкн тогтв. Энүнд әмтн бәәдг гермүдиг федеральн программар тосхв. Селәнә әмтн хуучн нурад унжах гермүдәс шин гермүдт нүүж орв. У-сарул болн бәәцин цуг таал бәәх бәәрнд нүүж орсндан эдн ик байрта бәәнә. Олн үртә Басират Ашурбекован келсәр, нурад унжах хуучг герт кесг жилдән бәәв. Нурад унх гиж оньдин әәдг бәәж. Олн үртә Басират Ашурбекован келсәр, хуучн герт бәәхд күнд билә, хойр хората аптьрт бәәцин таал му бәәсмн. Үвлднь киитн болдг билә, бичкдүд гемтәд бәәв.

Олн давхрта гермүдт бәәх әмтн болхла капитальн ясвр кехинь тенкән уга гидгәр күләжәнә. Пенсионерк Тамара Чепалован келсәр, давсн зун жилин далдгч жилмүдт тосхгдсн герт эрк биш ясвр кех кергтә. Герин ора хуучрад, нурад унх әәмшгтә, герин эрсн шуурад, бас ик әәмшг учражана. Тамара Чепалован келсәр, хур орхла, дусал дусад зовлнг болдг бәәсмн. Хурин усн гер дотр дүүрәд ордг билә.

Городовиковуск балһсна мэр Николай Середа келсәр, федеральн цутхлнгас ирсн мөнгәр, танһчин болн бәәрн бюджетас йилһж өгсн мөнгәр болн эздүдин оурлж өгнс мөнгәр федеральн программар зуг долан герт капитальн ясврин көдлмш кегдв. Талдан олн давхрта гермүд ясхин төлә мөнгн күртсн уга. Тер саамд гермүдин эздүдин орулж өгх мөнгнә кемжән өсәд, ода арвн тавн процент тогтажана.

Городовиковск балһсна мэр Николай Середа келсәр, ода арвн тавн-хөрн герт капитальсн ясвр кех кергтә. Эздүд өгдг мөнгнә кемжән ик болад, көдлмш кегджәхш. Урднь тавн процент ик гиж келж билә, ода арвн тавн процентинь өгх кергтә. Зуг герин ора ясхин төлә тәвн минһн арслнг цуглулх кергтә. Урднь нег хората патьрин эздүд нег минһн арслнг өгдг билә, ода һурвн минһн арслнг кергтә. Зәрм эздүд иим мөнг өгч чаджахш.

Танһчин ЖКХ-н министерствин зәнглсәр, олн давхрта гермүдт капитальн ясвр кехин төлә мөнгнә кемжән шинкн ирв. Ут-тоодан хальмг танһч арвн тавчн сай асрлнг авхмн. Эн мөнгәр зуг олн давхрта тавн гер ясж болх. Эннь давсн жилчә кесг холванд баһ болжана. Нидн жилд энүнә төлә дөчн тавн сай арлснг мөнгн йилһж өггдсн билә. Специалистнрин келсәр, эндр өдрт нег сай дөрвлжн метр олн давхрта гермүдт эрк биш капитальн ясвр кех кергтә болжана. Кемр энд цаглань ясвр эс кехлә, иим гермүд хуучн нурад унжах гермүдин тоод орх. Тиигхлә энүг ясхин төлә дала мөнгн кергтә болх.

Танһчин ЖКХ-н болн энергетикин министерствин заллтин ахлач Виктория Мангутован келсәр, эн жил танһчин болн бәәрн бюджетмудас нәәмн сай арслнг кергтә болжана. Ода деерән иим мөнгн уга. Шинкн программ тогтажанавидн. Талдан органмудла өгх мөнгиг зөвшәлж авх кергтә. Ясвр кех мөнгн олдх гиж санжана.

Келхд, иргч жилсә авн ЖКХ-н мөнгнә цааснд шин әнг капитальн ясврин төлә өгх мөнгнә әнг һарх. Капитальн ясврин сангд сар болһн гермүдин эздүд орулж өгх мөнгнә кемжәг региональн йосн хойр минһн арвн дөрвдгч жилин январин нег шин күртл тогтах зөвтә.

Ээнән Ольга, Очра Сергей, Хавтхна Анатолий