Гилән Бембеева Цаһан сарин байрт нерәдсн концерт үзүлв
Хальмгуд ончта Цаһан Сарин байран темдглв. Элст балһснд концертн залд Хальмгин ачта артистк Гилән Бембеева соньн концертн программ хаврин байрин өдр белглв. Сүл һурвн жилд билгтә дууч иим концерт үзүләд уга.
Сцен деер һарад, эврәннь хамгин чанһ неквртә зарһч — хәләһәчнртәһән харһлт кехин өмн Гилән зөвәр икәр үүмжәнә. Сүл һурвн жилд эннь түрүн концерт болжана. Хальмг улсин хаврин байрт нертә дууч шишлнг программ белдв. Энүнд урднь олн улст таасгднс дуд болн шин үүдәврмүд орв.
Хальмг танһчин ачта артистк Гилән Бембееван келсәр, һурвн жилин завсрин хөөн иим ик сценд танһчин һол концертн залд һархд үүмәтә болжана. Тер бйинь эндр цуглрсн әмтиг өврүлх саната. Нег үлү Бамб цецг ансамблин артистнр сән дөн болх. Цуг таанрт болн тадна өрк-бүлмүдт цаһан хаалһ дурджанав, цуһар эрүл-менд амулнг-менд бәәтн. Мана танһчин цуг әмтн бәәхтә жирһл эдлтхә.
Концертн ик залд олн күн цуглрв. Энүнә үүдәлтд дурта әмтн хальмгин эстрадын одна дуд кесг цагас авн сонсад уга. Цөн минут болад ик кезәнәс авн күләгджәсн концерт эклв. Билгтә дуучин дуулсн дууг “Бамб цецг” нертә государственн ду-бииһин ансамблин артистнр болн “Ариель” нертә бииһин коллектив кеерүлв.
Концертин йовудт Гилән Бембеева әврәәно хәләһәчнртәһән күүндсн деерән, шуд эфирт ик экранас күүндв. Сцен деер углж тәвсн ик экранас билгтә дууч олн әмтнлә күүндж чадв. Эврәннь тускарк елж өгәд, иргч үүдәлтин зуран тускар келж өгв.
Байрин концертд күндтә гиичнр дунд Хальмг танһчин толһач Алексей Орлов болн танһчин эрдм-сурһулин, сойлын болн номин министр Лариса Васильева болн Хальмгин үүдәгч интеллигенцин элчнр ирж, чикнә хужран ханһав. Хальмг танһчин искусствин ачта үүлдәч Аркадий Манджиевин келсәр, Гилән Бембееван концерт болһн танчһин сойлын ончта болн темдгтә йовдл болна. Энүнә концертиг олн әмтн ик эртәсн авн күләнә. Хальмг танһчин искусствин ачта үүлдәч Аркадий Манджиевин келсәр, Гилән Бембееван дуулсн дуд танһчин улсин зүркнд удандан төөнрж үлдхнь лавта. Энүнә белглсн үүдәврмүд олн әмтнд таасгдх зөвтә.
Байрин концерт олн улст икәр таасгдв. Дурта дууч Гилән Бембеевас эдн чеежин сермж авч, Цаһар сарин байрин өдр икр байрлх саам учрв. Удл уга танһчин әмтн энүнә концерт ирж хәләж чадх гиж Гилән келнә.
Бевина Мергн, Очра Сергей
