ГИБДД-н көдләчнр сокту жолачнриг илткхин төлә рейд күцәжәнә
Хальмг танһчин госавтоинспекц сокту жалачнриг илткж авхин төлә цуг маши залачнриг зогсаһад шинжлһнә бүртклһ кежәнә. Ода ГИБДД-н көдләчнр цуг автомобилистнриг зогсах зөвтә. Госавтоинспекцин то-дигәр, давсн жилд сокту жолачнр орлцата хаалһд учрсн зеткртә йовдлмудын ашт дөрвн күн әмнәсн хаһцв, далн нәәмн күн шавтв. Иим хурц бәәдл Әрәсән талдан чигн регионмудт тогтв. Тегәд Әрәсән Государственн Думин депутатнр соктуһар маши залж йовсн улсиг чанһ засгла харһулх зака батлж авла. Ода инспектормуд дару-дарунь рейдмуд кежәнә.
Эн байн дамшлтта жолач медәтә болв чигн, соктуһар маши залхла ямаран засгла харһулгдхан меджәхш. Эн күн соктуһинь алкотестер угаһар медж болжана. Тер бийнь әрк уусн угав гиж гөрдж һархар седв. Лайф Әрк уусн угав гиж келнә.
ГИБДД-н инспектормуд жолачд медицинск шинжлтд орх селвг өгв. Энүнә төлә алкотестерт үләх кергтә болжана. Болв бәргдсн жолач зуг наркологическ диспансерт шинжлтд орхан медүлв. Автоинспектормудын техникд иткжәхш. Эннь энүнә зөвнь.
Госавтоинспектормудын цәәлһсәр, эднә көдлмшт олзлгджах прибор цуг кемжәнд ирлцжәнә. Хальмг танһчар ГИБДД-н салу батальона шишлнг техникин инженер Валерий Загура келсәр, иим прибор сертификатта болна, энүг цуг Әрәсәд шишлнг цутхлгд бүрткж хәләнә. Эн прибор көдлмшт белн. Жолачнр энүнд медицинск шинжлтд орж чадх. Энүнә төлә нег дәкж олзлдг мундштук бәәнә. Энүг жолач эврән хәләж шинжлж чадх.
Энүнә хөөн талдан патрульн церглтәс зәнг ирв. Инспекторин келсәр, жолачиг бәрж авхин төлә дөрвдгч микрорайона гермүд заагур гүүлгх кергтә болв. Аштнь жолач алкотестерин шинжлтд орх зөвшәлән өгв. Алкотестерин то-дигәр, икәр соктсинь медүлжәнә.
Тер саамд талдан маши залач наркодиспансерт күрггдв. Энд кегдсн цуг шинжлтын ашт эн жолач соктаһар маши залж йовсн бәәж гиж илткгдв. Ода сокту жолачнр чанһ засгла харһулгдхмн. Иим рейдмуд сән ашта болна. Иим керг-үүлдвмүдин ашт хаалһд зеткртә йовдлмуд гетлүлгднә, әмтнә эрүл-менд харсж авгдна. Хальмг танһчар ГИБДД-н ах инспектор Василий Кекеевин келсәр, иим шишлнг керг-үүлдврмүдин йовудт полицин көдләчнр талдан зөв-йоснта органмудын көдләчнрлә хамдан хаалһд цуг машидыг зогсаһад бүрткжәнә. ДПС-ин көдләчнр цуг жолачнриг шинжлж хәләнә. Кемр маши залач эрүл болхла, цаарандан йовж чаджана.
Дөврн частан болсн рейдын ашт хаалһин зокал эвдсн жирн зурһан йовдл илткгдв, эднәс соктуһар маши залж йовсн арвн күн бәргдв. Ода эдн зарһин шиидвр күлжәнә. Эдн цугтан хойр жилдән маши залх зөвән геев. ГИББД-н кесн рейдын йовудт Элст балһсна аһуд нег чигн зеткртә йовдл учрсн уга, күн әмнәсн хаһцсн уга. Болв өдр болһн иим рейд күцәхин төлә полицин көдләчнр күртшго. Жолачнриг оньдин чанһар бүрткж хәләх кергтә болжана. Эс гиж гиж эдн Әрәсән зака эвдәд, соктуһар маши залад, әмтнд ик әәмшг учражана.
Гольдина Ирина, Настан Сергей
