Гер-мал уга, һаза хондг әмтнд ик киитнд дегд күнд болна
Сүл цагт тогтсн ик киитн танһчин зәрм улсиг байрлулжахш. Гер-мал уга, һаза хондг әмтнд иим кемд дегд күнд болна. Сүл өдрмүдт Троицкое селәнд бәәх шишлнг медәтнрин герин әнгд даарад көрсн долан кү авч ирв. Иим улс үвлин кемд ямаран таалд бәәхин тускар мана сюжетас медж болх.
Людмила Генжикевичиг Волгоград — Элст хоорндк хаалһд олж авч. Эн күүкд күн Волгоград балһснас Троицкое селәнд бәәх шишлнг социальн бәәрнд күрхәр һарч йовж. Урднь энүг нааран нег дәкж авч ирсн бәәж. Тегәд ода бас ик киитн болв чигн, Троицкое селәнд күрх күцлтә бәәж. Энүнә тускар директор Артур Натыров келнә. Жирн наста пенсионерк төрскн Челябинск балһснас хол Хальмг танһчд яһад ирсн тускар медж авдг арһ уга болв. Людмила Генжикевич келсәр, Челябинск балһснд күүкн, көвүн болн дү бәәнә.
Ода Троицкое селәнә шишлнг бәәрнд энүнә тускар сәәнәр медж авхар бәәнә. Энүнә элгн-саднла күүндв, болв тендәс хәрү ирәд уга. Иим улсиг мана танһчин булнг болһнас нааран авч ирнә. Эдниг автохаалһд, вокзалмудт даарад, өлсәд харһнад бәәсинь олж авна. Янина Меклявичуте Литвад төрсн күүкд күн. Элстин автовокзалд яһж ирсн тускар медхш. Ода энд бәәршлх сана зүүжәнә. Янина Меклявичуте келсәр, бәәдг гер уга, тегәд арһ уга нааран ирв. Тегәд чигн Элстин вокзалд хондг бәәж.
Өдгә цагт медәтнрин болн инвалидмудын танһчин гер-интернатд гер-мал уга улсин социальн әнгд һучн һурвн күн бәәнә. Эднәс долан күн шишлнг приемникд бәәршлжәнә. Хөр хонад карантина хөөн эдн энд үлдх эс гиж хәрү уульнцд бәәхин тускар шиидвр авх зөвтә. Танһчин медәтнрин болн инвалидмудын директор Артур Натыровин келсәр, хөрн хонгтан юридическ, социальн халхар иим улст нөкд болнавидн. Юристнр иим улст кергтә дөн күргжәнә.
Ода пенсионермудын интернатд цуг бәәцин таал бүрдәгдв. Гер-мал уга, элгн-садндан керг уга әмтнд кергтә килмж өгнә, энд иим улс йосн кевәр бәәж чаджана. Эднәс зәрмнь нааран тусхин өмн, һаза бәәршлжәсмн. Интернатд болхла эднд өдрт дөрв дәкж хот өгнә, медицинск болн психологическ дөн күргнә.Тер бийнь өрк-бүлтәһән ни-негн бәәж, элгн-саднас дөн авч бәәхлә, энүнәс сән юмн бәәхий?
Татьяна Дмитриева, Жамбин Дмитрий
