Гемин уршгар хальмгин университетин професоор Очр Мукаева сәәһән хәәв
Хальмг танһчин номин ниицән икәр һарутв. Хальмгин государственн университетин профессор, Әрәсән номин ачта үүлдәч Очр Джогаевна Мукаева гемин уршгар сәәһән хәәв. Эндр хальмгин университетд энүг сүл хаалһднь үдшәлһнә митинг болв. Энд профессор Мукаева кесг жилдән чидлән нөөлго көдлсмн. Күндтә номтыг сүл хаалһднь үдшәхәр танһчин йосна элчнр, хамдан көдлжәсн номтнр, оютнр болн олан үүлдәчнр ирв. Тәхвсн күцлдән экр биш күрдг, бийдән чанһ неквртә болн гүн медрл авхар зүткж йовсн төләдән Мукаева докторск диссертац харсад, профессорин цол зүүсн хальмгин түрүн күүкд күн болв. Энүнә тускар санлын митингд орлцсн әмтн келв.
Очр Мукаеван үүлдврин нилчәр Хальмгин университетин педагогикин болн психологин кафедрт аспирантур секгдв, билгтә номтын бичсн олн дегтрмүд һарв, региональн болн нарта-делкән номин дамшлтын олн-зүсн конференц бүрдәгдв. Төрскндән ик ач-тус күргсн төләд Очр Джогаевна Мукаева государствин өөдән ачлврар — келн-улсин иньглтин орденар ачлгдв.
