Эндр түүмр унтралһна церглтин көдләчнрин сән өдр
Эндр түүмр унтралһна церглтин көдләчнр эврәннь эрдмин сән өдрән темдглжәнә. Харсачнрин ик зунь эврәннь байрин өдрән көдлмштән тосжана. Байрин өмн өргнд танһчин түүмр унтралһна церглтин көдләчнр эрдмин марһанд чидлән сөрв.
Хамгин түрүнд марһанд урднь сән үзмж бәрәд, зональн дөрлдәнд эврәннь әнгин нер харссн көдләчнр орлцв. Игорь Донской арвн тавн секундын эргцд шишлнг давшурар өндртән арвн хойр метр сурһулин цамхаг деер һарч чадв. Жюрин гешүдин келсәр, эннь хамгин сән күцәмж болжана. Церглтин кемжәһәр харсачнр иим цамхагд дөчн секундын эругд һарх зөвтә. Игорь Донской келсәр, өдр болһн гилтә дамшлтын көдлмш кеснәс көлтә иим сән үзмж бәрж болв. Тер мет энүнд эк-эцкнь сән үлгүр-үзмж болжана. Урднь эдн түүмр унтралһна церглтд көдлж йовсмн. Негдгч тойгта түүмр унтралһна әнгин көдләч Игорь Донской келсәр, эндр бәрсн үзмж таасгдв. Сән белдвр кехлә, иим күцәмж бәрж болх.
Евгений Куцов бас сән үзмж бәрж чадв. Игорь Донскойяс зуг хойр секундт хоцрв. Түүмр шатсн кемд әмт харсж авлһнд байн дамшлт хоршасн көдлмш һол чинр зүүнә. Олн-зүсн марһаст орлцда, харсачнр эврәннь эрдмин дамшлтан өөдлүлнә. Тер мет иим дөрлдәнә йовудт дуту-дундс илткгднә, эндүһән чиклж болна. Ода түүмр унтралһна церглтин специалистнр эврәннь көдлмштән һол төр болж школмудын сурһульчнриг уйн наста түүмр унтрадг улсин әнгд орулж авлһнд ик оньг тусхажана. Бичкдүдт специалистнр әәмшг уга бәәлһнә зокал дасхна, иргчдән эн халхар көдлх күцл тәвхд дөн болжана.
Хальмг танһчар МЧС-ин түүмр унтралһна заллтин әнгин ах специалист Владимир Слободчиковин келсәр, сүл цагт церглтд ирнс хөрн — хөрн тавн наста көвүд урднь нааран ирж көдлжәх улсас тиим чанһ-чиирг биш. Тегәд эднә белдвр невчк талдан. Зәрмнь сән белдвр кеж, талдан улс иим белдвр кеж уга. Иим марһан иргчдән чигн болх. Ода бичкдүдиг эн эрдмд оруцлх санан бәәнә. Эднд дөн болад, өсхләнь көдлмшт авч болх.
Эн жилин марһанд зурһан команд дииләчән йилһв. Эдн нурһлж Элст балһсна түүмр унтралһна гарнизона элчнр болжана. Танһчин райодас зуг Целинн района көдләчнр ирж дөрлдв. Марһанд орлцсн көдләчнр хөрн дөрвн секундын эргцд зун метр боомтг давж һарх зөвтә бәәсмн. Тер мет эдн усна сурвлж татад, күнд бәәдлд туссн улсиг харслһна дееснә дөнгәр һалас һарж авх даалһврта билә. Марһана зокал түүмр шатсн бәәдллә әдл болв.
Целинн района доладгч тойгта түүмр унтралһан әнгин ахлач Владимир Настаевин келсәр, Целинн района гарнизон элчлжәнә. Марһанд сән күцәмж бәрж чадв. Зәрм көдләчнр балһсна специалитснрас сәәнәр дөрлдв. Түүмр унтрасн кемд олзлдг давшур олзлгдан үзүлвидн. Иим дамшлт көдлмшт кергтә болна.
Эндр эврәннь эрдмин сән өдрлә түүмр унтралһна церглтин көдләчнр көдлмштән церглжәнә. Эдн ямаран чигн цагт әмтнд дөн күргхдән белн бәәнә.
Ээнән Ольга, Очра Сергей
