Эндр телевиденя көдләчнрин сән өдр
Эндр телевиденя көдләчнр сән өдрән темдглжәнә. Эн халхин көдләчнр таднд өдр болһн мана танһчд учрсн һол йовдлмудын тускар зәнглнә. Телевиденя нарта-делкән өдриг бидн көдлмшин ормдан тоссн бийнь, эндр шин зәнгс яһж кедгин утскар келж өгх санатавидн. Мана зәнгчин һол күцлнь — өдр болһн учрдг йовдлмудын тускар хамгин түрүнд медж, хәләһәчнртә зәнглх төр болжана.
Телевиденя герт шин зәнгсин хора хамгин ик. Энүнд шеф-редактормуд, продюсермуд болн зәнгчнр көдлнә. Шин зәнгсин һарцд эндр минь ода мана танһчд учрсн йовдлмудын тускар келгднә. Журналист болһн эврәннь авсн даалһврар шин материал белднә. Хальмгт учрсн йовдлын тускар чик кевәр зәнглхлә, шин зәнгсин сән чинртә материал белдж болна. Зәнгчнр олн-зүсн төрмүдәр зәнг кенә, тер тоод ик чинртә, әмтнд соньн болх, зәрмдән өвәрц материал белдх кергтә болна. Хамгин һол күцлнь — эднә белдсн материал хәләһәчнрт соньн болх зөвтә. танһчин әмтн телевизорар шин зәнгсин һарц күләж хәләнә.
Эн күүкд күүнә келсәр, шин зәнгсин һарц дангин хәләнә. Сәәнәр үзүлнә. Бичкдүдин төлә программ кех кергтә гиж эн күүкн тоолжана. Эн күүкд күүнә келсәр, халмьг кел эс медв чигн, “Өрүнә һарц” таасгдна. Таньдг улс һарх гиж күләнә. Телевиденя цуг программ хәләнә. Цугнь таасгдна гиж эн келв.
Өдр болһн шин зәнгст көдлжәх улс ик көдлмш күцәнә. Шуд эфирт көдлхлә, журналистнр, режисеермуд ик оньган өгч көдлх зөвтә. Иим кемд эндү һарһх зөв уга болжана. Зәрмдән шин зәнгсин һарцд нег секунд ик чинр зүүнә.
Телевиденьд көдлдг улсин келсәр, ямаран күнд болв чигн, эдн эврәннь көдлмштән йир дурта. Зәрмдән эдн асхн ора күртл, зәрмдән сөөннь өрәл күртл чигн көдлнә. Зәнгчнр манһдур шин зәнг хәәж авхин төлә альдарн йовхин тускар медхш. Өдр болһн әдл биш. Шин әмтнлә харһад күүнднә, танһчд учрдг йовдлмудыг хамгин түрүнд үзж, энүнә тускар зәнглнә.
Зәнгч Елена Алексенко келсәр, телевиденьд зуг өрхл жил көдлжәнә. Көдлмш соньн, таасгдна. Энд көдлхд соньн. Телевидень нег ни-негн өрк-бүл. Энл көдлжәх цуг улс нег керг соньн сонсхвр белднә.
Видеозург цокдг авдг улс — оператормуд. Эдн хамдан ни-негн кеәвр көдлжәнә. Иим зург цокеж авхд амр биш болн ик дааврта керг. Нег үлү, жил болһн гилтә техник шинрүлгджәнә. Энүг олзлдг дамшлт хоршах кергтә. Олн зәнглһнә эв-арһин халхар болжах хүврлт региональн телевиденя делгрлт некжәнә. Өдгә цагин телевидень дөрлдәнә шин таалд көдлжәнә. Мана программ таднд соньн болхинь тадн мана хәләһәчнр эврән шүүж авнат. Эврәннь хәләһәнрләһәрн итклтә күүндвр кеж көдлх төр журналистнрин һол төрин негнь болжана. Эн жил ГТРК “Калмыкия” эврәннь сонсхврмудын цаган икдүлв. Вести-Калмыкия программд келн-улсин блокмуд бәәнә.
ГТРК “Калмыкия” директорин дарук, зәнглһнә церглтин ахлач Гиляна Гросул келсәр, Эн жиләс авн телекомпаня эфир икдв. Ода региона шин зәнгс “Россия 1” телеканал һарсн деерән, “Вести-24” телеканалд һардг болв. Шин рубрик, тематическ программ кехәр зүткжәнә. Хәләһәчнрт соньн зәнгс күргж медүлхәр көллектив көдлжәнә.
Эн жиләс авн шин зәнгсин һарц амрлһан өдрмүдт эфирт һардг болв. Тер мет Вести-калмыкия сайтыг хәләһәчнр дурлж хәләнә. Энүнә нилчәр шин зәнгсиг цуг нарта-делкәд хәләж болх. Ахрар келхд, көдлмш дала. Тегәд чигн журналистнр телевидениг эврәннь хойрдгч гер гиж тоолна. Дамшлтта журналистнр баһ наста көдләчнрт сүв-селвгүдән өгч дөн болна. Келхд, эн өрк-бүләрн көдлдг улс бас бәәнә. Шин зәнг тархадг эв-арһсин дунд телевидень олн улст дунд тааста эв-арһ болжана.
Ээнән Ольга, Эрнжәнә Эрднь
