Эндр правительствин дарани сүүр болв
Хальмг танһчд нефть һарһж авлһна кемжән баһржана. Йирн тавдгч жилд дөрвн зун минһн тонн һарһж авгджасн болхла, давн жилд зун далн минһн тоон авгдв. Энүнә тускар эндр правительствин сүүрт йиртмжин көрнгин министр Владимир Мирошниченко зәнглв. Энүнә келсәр, мана региона нефтин көрнг һурвдгч-дөрвдгч олзлгдсн девснгд бәәнә. Талданар келхлә, цуг көрнгин далн-найн процентнь һарһж авгдв, тегәдч игн ода эн кемжән баһржана. Нег үлү, танһчин аһуд сүл жилмүдт нефть һарһж авдг һурвн компань көдлмшән күцәжәхш. Эдн банкрот болад, экономикин күнд бәәдлд тусад, үүлдврән зогсав. Өдгә цагт шин көрнг олдгдад уга. Зуг ик компаньс нефть хәәж авад, һарһж чадхмн. Ода танһчин һардвр иим компаньс хәәжәнә. Тегәд чигн мана регионд нефть һарһж авлһна кемжән икдх гиж келж болшго. Дәкәд болхла хальмг танһч кергтх кемжәнәс зун зөрн процент газ һарһж авчана. Иим кемжән давсн жилин кемжәнлә әдл. Сүүрт талдан чигн төрмүд хәләгдв.
