Эндр нарта-делкәд эрмдгтә улсин өдр темдглжәнә
Эндр нарта-делкәд эрмдгтә улсин өдр темдглжәнә. Шидр хотл Элст балһснд «Мы такие, как все, только сильнее» нертә танһчин керг-үүлдвр давв. Энүнд 15 насас авн 50 нас күрсн спортсменмүд орлцв. Энүнә һол күцлнь эрмдгтә улсин цогц бахмуд батруллһн болжана.
Элст балһснд бәәх Ольга Антонова зөвәр билгтә күүкд күн гиж келх кергтә. Эврә бичсн шүлгүдәрн олыг соньмсулж йовх күн болжана. Терүнәс давад, шүлг бичдг улс дунд давулгддг нарт-делкән «Филантроп» нертә мөрән номинат болсмн. Эннүәс нань Ольга олн-зүсн хатхмр кенә. Энүнә кесн ке-сәәхн көдлмшиг һәәхүлд үзж болхмн. Цуг деер заагдсн тоотас нань спортд дурта, шатр сәәнәр наадна. Дәкәд болхла кесг дәкч армреслингин марһанд орлцсмн. Өмнән дангинд зура тәвж, тер зураһан эрк биш күцәх күсл тәвж үүлддв гиж Ольга Антонова келнә.
Ольга Мукобинова болхла бас шунмһа бәәдл-жирһләр бәхдән дурта. Марһанд орлцхин кергт хотл һалһснас зөвәр уужмд бәәх Лаганя района Джалыково селәнәс ирсмн. Настольн теннис наадна марһанд орлцад, эрк биш диилвр бәрхәр зүткжәнә. Күн болһн ямаран эрмдгтә болвчн арһан һарһад үүлдх зөвтә. Дәкәд болхла, өөрхн улсин хәләвр ик дөнг болна гиж эн күүкн тоолжана.
Элст балһснд бәәх 15 Иван Рогов йир шулун-шудрмг көвүн. “Дон Оресте” нертә реабилитационн цутхлнгин күүкд ю болвчн кеж чадна: кевс хатхна, нноснас сиилк, билцг, күзүндән зүүдг тоот чигн кенә.Цуг эн кергт эднд эднә суурһмжлач Альберта Деклара сүв-селвгән өгч дөнг-нөкдән күргнә. Эн соньн керг-үүдлврин йовудт Әрәсән паралимпийск командын эмч Дольган Лиджиев орлцв. Ямаран чигн зховлнгас гетлгж болшго. Зәрмнь күнд йовдл харһхла арһан гееһәд зовна, зәрмнь болхла цуг чидлән һарһад Гемләһән ноолдад, би арһтав, чидлтәв гисн күслтәһәр бәәнә. Эднд хажуһаснь дөнг болхла , эдн улм арһатан чидлтәһән үзүлж садхмн гиж Дольган Лиджиев темдглв.
Эрмдгтә улсин сән өдрт нерәдгдсн керг-үүлдврт орлцсн танһчин һардачнр дарук жилд танһчд иим эрмдгтә улсин реабилитационн цутхлнг тосхгдхин тускар келв. Эндр өдр хальмг танһчин бәәрн әмтнә арвн күүнәс негнь эрмдгтә болжана. Социальн харслтын тоод хөрн дөрвн минһн күн зогсчана. Эднәс хойр минһнь бичкдүд. Инвалидмудин, эрмдгтә улсин бәәдл-жирһлинь невчк ясрулхин кергт орн-нутг цуг арһан олзлжана гид келх кергтә.
Зубцан Татьяна, Очра Сергей
