Эндр медәтнрин нарта-делкән өдр
Эндр медәтнрин нарта-делкән өдр. Эн байрт нерәдгдсн керг-үүлдврмүд цуг танһчин райодт болжана. Байриг хөрдгч зун жилд экләд темдглдг болв. Түрүләд сән өдриг Европд, хөөннь Америкд темдглдг авуьяс тогтв, энүнә хөөн цуг нарта-делкәд эн байр темдглдг зангшал тогтсмн. Эн өдр олна организацс болн сангуд олн-зүсн буйнч седклин керг-үүлдврмүд бүрдәж давулна. Байрин өдр көгшн улсиг күндләд, насни туршт үрдүдтән, ачнр-зеенртән удран өгч килмж өгч өсксн медәтнрт ик ханлт өрггднә. Танһчин улсиг байрин өдрлә Хальмгин толһач Алексей Орлов йөрәжәнә. Энүнә йөрәлд иигж келгджәнә: “Ода мана танһчд медәтнриг дөннлһнә социальн программ сән үзмжтәһәр күцәгджәнә. Эднд олн-зүсн социальн дөнцл мөнгн өггджәнә. Социальн теткврин учрежденьсин делгрлтин болн больниц, поликлиникүдин материальн техническ ул батрулһна төлә танһчин бюджетас мөнгн йилһж өггджәнә. Танһчин һардвр цаарандан чигн иим социальн ик чинртә көдлмш күцәх”.
