Эндр хальмгуд Зулын байр темдглжәнә

Эндр Хальмг танһчин әмтн келн-улсин хамгин һол байр — Зулын байр темдглжәнә. Эн өдр шин жилин байр гиж нерәдгднә. Тогстн авьясар эндр Элстин цутхлнг хурлд байрин ик мөргүл болв. Арвн негн часла концертн программ эклв. Энүнд шин жилин авьяс үзүлгдв, алдр Зунква гегәнд нерәдгдсн авьяс күцәгдв. Арвн дөрвн часла хурлд санлын мөргүл эклв. Асхлад Бурхн Багшин алтн сүмд арвн дөрвн часла гелнгүд болн олн әмтн хурл эргәд Мигзм умшх, арвн долан пандитнрин көшәд зул өргх.

Хальмгудын өрк-бүл болһнд Зулын байрин өмн өдр боорцг кеж, күншүн үнр герт орулдг авьяс бәәнә. Герин эзн күүкд күн болһн боорцгин һуйр эврә янзар элдж белднә. Нурһлж күүкд улс целвг-тохш кенә.

Антонина Босханджиеван келсәр, эн өдр өвкнриннь цуг зангшал-авьяс күцәхәр зүткнә. Энүг бичкдүдтән дасхжана. Хальмгин зандн цә угаһар ямаран чигн байр хальмгуд темдглхш. Цәәһин деежиг олн деедс бурхсдан нерәдж тәвнә. Ширәд келн-улсин эдлдг хот-хол — тосн, махн-шөлтәһән, әмтәхн хот-хол эвлгәр тәвгдх зөвтә. Зулын байрла эврәннь эк-эцкнрән болн медәтә улсиг күндлх кергтә. Эдниг тооһад, белгән бәрүлж өгх авьяс бәәнә.

Асхлад өрк-бүл болһнд Зулын онц авьяс күцәх кергтә. Тенгрт одн күцхлә, насна һол шатах зангшал бәәнә. Һуйрас онһц кеһәд, дотрнь цаһан өвснә һол тәвнә.

Эндр Хальмг танһчин цуг хурлмудт байрин ик мөргүл болх. өрүн эртәс авн олн әмтн хурлд ирәд, насан уттулһна, Зунква гегәнд нерәдгдсн мөргүлд орлцна. Зулын байрла шар шажна ул тогтасн Зунква гегәнә төрж мендлсн болн паринирванд күрсн өдр гиж тоолгдна. Иим мөргүлд мөрн болн хулһн жилтә улст эрк биш орлцх кергтә. Мөрн жилтә улст арвн хойр жилин эргц төгснә, хулһн жилтә лус болхла мөрн жилтә улсла таархш. Хальмгин хурлын зурһачин тааврар иргч жил давжах жиллә әдл төвкнүн аюл уга жил болх.

Зурхач Сана Матвеновин келсәр, мөрн болн хулһн жилмүдт төрсн улст оржах жил невчк күнд болх. Талдан жилтә улст гем-уга сән жил болх зөвтә.

Урднь хальмгуд шин жилин байриг цуг хотнарн тосж темдглдг бәәж. Нег ишкә герт цуглрад, цуг улсин һарсн өдр темдглдг билә. Домбр цокад, ду дуулад, бииләд нәр-наад кедг авьяста. Ода хальмгуд иим кевәр Зулын байр темдглхш. Тер бийнь кезәнк авьяс-зангшалыг хадһлад, дорас өсж йовх баһчудт медүлж өгчәнә.

Ээнән Ольга, Эрнжәнә Эрднь