Эндр Хальмгин деед сурһульд номин хүүвин сүүр болв
Эндр Хальмгин государственн университетд номин хүүвин сүүр болв. Энүнд алдр бичәч болн шүлгч Көглтин Даван жилд нерәдгдсн керг-үүлдврмүд Хальмг танһчд кезә болн альд болхин туск диг-даран батлж авгдв. Эн жил Көглтин Дава йирн нас зүүх бәәсмн. Энүг нарта-делкән алдр күмнч гиж нерәднә, энүнә үлдәсн үүдәгч зөөр мөнкинд үлдх, эврәннь номин библиотекан Көглтин Дава оютнрт герәслсмн.
Көглтин Дава Хальмгин государственн университетла өөрхн залһлда бәрж йовсмн. Найн нәәмдгч жилд алдр бичәч хальмгин литературин кафедрин түрүн һардач болж көдлв. Йирн тавдгч жилд деед сурһулин күндтә профессорин нерн зүүлһгдв. Хойр минһн доладгч жилд Көглтин Даван библиотекнь энүнә герәснә үгәр Хальмгин университетд өггдв. Дорас өсж йовх уйнр иим дегтрмүд умшад, эврәннь уул авьяс-зангшалан сәәнәр медх гиж сансмн. Хальмгин деед сурһулин номин библиотекин директор Надежда Каншаеван келсәр, ода номин библиотек ном-зүүһин зааһур белджәнә. Энүнә нернь Автографы заговорили нертә болх зөвтә. Энүнд бәәх материал Көглтин Даван үүдәлтиг дасхд сән нилчән күргх. Иим ном-зүүһин зааһурин һол күцлнь — хальмг келн-улсин сойлла болн зангшалла баһчудыг өөрхн таньлдулһн болжана.
Иим Көглтин Даван зөөр оютнрт сурһульднь ик дөн болх зөвтә. Энүнә библиотект һурвн минһн дегтр бәәнә. Энүнә зәрминь шүлгч эврән хулдж авч. Талдан дегтрмүдиг нер-усан бичәд нертә номтнр, шүлгчнр, бичәчнр белглсмн. Филологическ факультетд Көглтин Даван үүдәлт дасж. Көглтин Дава хальмг танһчдан йир дурта төрскнч күн билә. Хальмгудыг цаажла харһулхла эн күн үн келәд, хальмг нерән дуудулв.
Ода өвәрц дегтрмүдиг олн әмтн ирж умшжана. Өдгә цагин баһчудыг эврәннь келн-улсин литературиг умшхш гиж тоолна. Болв ода танһчин баһчуд иим дегтрмүдәр икәр соньмсжана. Эдн Көглтин Даван үүдәлтиг үнлж, дурлна. Зәрм оютнр энүнә үүдәвриг чеежәр келж өгнә. Көглтин Даван үүдәлтин болн жирһлин хаалһин тускар медәд, ээнь сурһмжин чинртә болн үлгүр-үзмж болна гиж тоолжана. Хальмгин университетин проректор Владимир Имеевин келсәр, алдр шүлгчлә болсн олн харһлтд орлцж, энүнлә күр-күүндвр кесмн. Көглтин Даван гүн ухан медрл өвәрц болж медгдв. Иим алдр бичәчәр бахмж кех кергтә.
Көглтин Даван санл мөнкрүлж, күндлһнә төлә Хальмгин университет ончта өөнин керг-үүлдврмүдин седвәрч болн бүрдәһәч болжана. Алдр бичәчин үлдәсн зөөриг баһчуд сәәнәр медх зөвтә. Энүнә тускар энүнә шүлгд келгджәнә.
Ээнән Делгр Хулхачин Николай
