Эндр хальмг улс Зулын байр темдглв

Эндр хальмг улс Зулын байр темдглжәнә. Тогтсн авьясар уул зангшал мана танһчд сергәж босхгдад, хальмг улсин өрк-бүл болһнд зул өрггднә.

Сарн Шараевна Мукаева байрин өмн өргнд амтта, шимтә боорцг кеж, зулын һол бас белдсн бәәнә. Зулын байр тосад одн күцхлә Зунква гегәнд зул өргәд шин жилән экләд тосв. Йириндән Зулын байрин өдр хальмг күн болһн эврәннь насндан нег жил немдг йоста. Тегәд эн өдр цуг улсин өдр гиж тоолгдна. Эндр медәтә күүкд күн эрк биш һуйрас онһц кеһәд насни һолан өргәд, зул асах. Келхд, Сарн Мукаева 5 үрән өскәд кү кев, ода 1З ачнр-зеенртә, 10 жичтә.

Зулын өдр ээжән байрла йөрәхәр энүнә элгн-садн, өөрхн улснь ирх. Зулын байриг олн әмтн сергмжтәһәр темдглж, нег-негндән гиичд одна. Өрк-бүл болһн ирсн гиичнриг халун жомбаһар, боорцгар тоодг авьяста. Бичкдүдт болхла әмтәхн хот белглнә. тер мет Сарн Шараевна байрлад, дурта дууһан дуулж өгх.

Дәәнә цагт Сиврт, төрскн һазрасн холл яһж зул темдглсән медәт ода күртл сәәнәр тодлна. Тер һашута жилмүдт хальмгуд цугтан зулан темдглдг бәәсмн. Тегәд чигн Зул-Цаһан байриг күнд жилмүдт чигн тосад, темдгләд, чеежин сергәмж авдг билә. Хальмг улс цаажла харһсн бийнь эврәннь уул загшалан мартсн уга.

Эндр болхла Сарн Мукаева эрк биш хурлд одад, Зунква гегән бурхндан өргц кеһәд, Зул өргх. Иим әрүн шажна авьяст орлцад, әмтн ик буй киискнә. Йириндән Зулын өдр өрк-бүл болһнд улан зандн цәәһәрн дееж өргәд, йөрәл тәвдг авьяс бәәнә.

Ээнән Дельгр, Ирчин Алексей