Эндр Хальмг Танһчд түрүн болж хальмг шүлгләнә өдр темдглжәнә

Эндр Хальмг Танһчд түрүн болж хальмг шүлгләнә өдр темдглжәнә.Эн өдр Көглтин Даван йирн жилин өөнд нерәдгдсн болжана. Байрин керг үүлдврмүд бүкл жилдән давх. Элст балһснд “Зов апреля” гидг марһан болх, Москва балһснд болхла зурачнрин галерейд «Мир образов Давида Кугультинова»гидг керг үүлдвр бүрдәж давулгдх. Диилвр бәрсн көвүд күүкд Көглтин Даван мөрәһәр ачлгдх.

Эндр Хальмгин олн-әмтнә шүлгч Көглтин Даван йирн жилин өөнин өдр. Зурһан жил хооран алдр мана бичәч, шүлгч сәәһән хәәв. Эн өдрмүдт цуг Танһчин школмүдт бичәчд нерәдгдсн кесг керг үүлдврмүд бүрдәж давулгджана. Элст балһсна З—гч тойгта школд Көглтин Даван музей секгдв. Эн байрин керг үүлдврт Хальмг Танһчин бичәчнр, ачта артистнр орлцв. Көвүд күүкд чеежәр дассн шүлгүд келж өгв, багшнр секәтә кичәл үзүлв.

Цуг хурсн әмтн алдр нертә Кугультиновиг тодлад, эн күүнә хальмгин литературт орулсн аһу ик нилчин тускар келв. Эндр өдр дорас өсч йовх баһчудт Көглтин Даван бичсн үүдәврмүд туста болх гиж Хальмгин бичәч Владимир Нуров келв. Тер юнгад гихләг эндрк баһчуд урд жилмүдин бәәдл жирһлиг медшх, Көглтин Даван бичсн шүлгүдт күн болхн хальмг улсин зовлнг, байр чигн үзж чаджана. Нертә бичәчин шүлгүд ик бичкн угад таасгдна.

Зурһан жил хооран, харм төрхд, хальмгин шүлгләнә герл, олн улсин иткл — Давид Кугультинов сәәһән хәәв. Кедү жил давв чигн энүнә үлдәсн үүдәврмүд мана цуг улст алтн болсн зөөр болад үлдхнь маһд уга.

Наталья Колдаева