Эндр Элстд хаалһд зеткртә йовдл учрв

Эндр Элст балһснд правительствин герин өөр хаалһд зеткртә йовдл учрв. Очра Номтын нертә уульнцд маши залач медәтә күүкд кү дәврв. Энүнә туск зәнг тер дарунь гилтә ГИББД-н әнгд ирв. Энүнә хөөн хаалһин инспекцин көдләчнр болн эмчнр ирв. Жирн һурвн наста Элстин бәәрн күүкд күн энүнә ашт күндәр шавтв. Ода күүкд күн танһчин больницд орулгдв. ДПС-ин инспектормудын келсәр, зеткр учрсн һазрт машид йовх зөв уга. Энд зуг әмтн йовдг хаалһ бәәнә. Полицин инспектормудын келсәр, давсн жиллә дүнцүлхлә, Элст балһсна уульнцд учрдг зеткртә йовдлмудын то зөвәр өсв. Нег сәнь, энүнә ашт әмнәсн хаһцсн улсин то баһрв. Эн жилин һурвн сарин эргцд хаалһд нег чигн күн әмнәсн хаһцсн уга. Нидн жил болхла зеткртә йовдлас көлтә нәәмн күн хорв.