Эндр Элст балһсна хургин дарани биш сессин сүүр болв
Эндр Элст балһсна хургин дарани биш сессин сүүр болв. Энүнд депутатнр арвн төр хәләв, тер тоод алвна, һазрин төрмүдәр тодрха күүндвр кегдв. Сүүрт һол төр болж иргч жилин Элст балһсна бюджетин туск төр хаһлгдв. Хотл балһсна бюджетин оруһин халх нәәмн зун далн долан сай арслнг тогтажана. Һаруһин халх болхла йисн зун һучн долан сай арслнгд күрх. Бюджетин мөнгн социальн халхд йовулгдх. Эн кемжән далн зурһан процент тогтах. Урдк жилмүдлә әдл иргч жилд ЖКХ-н халхд ик оньг тусхагдх. Энүнд зун арвн нәәмн сай арслнг йилһж өггджәнә. Тер мет эрүл-менд харлһна, эрдм-сурһулин, сойлын халхд онц оньг тусхагджана. Элстин хазнд мөнгн ховр болснас көлтә, хамгин түрүнд бюджетн халхин көдләчнрт болн бәәрн залврин элчнрт жалв өггдх.
Эндр Владимир Путина олна региональн приемна көдләчнр Баһ Дөрвдә районд селәнә улсин төрмүд хаһлв. Хальмг танһчин олн-әмтнә хуралын ахлачин дарук Хонһр Эльбиков, хуралын депутат Эрдни Гагуев, һазрин, зөөрин, жилишн-коммунальн эдл-ахун болн энергетикин министерствсин элчнр селәнә улсла харһлт кев. Тер мет энд Хальмг танһчин күүкд улсин ниицәнә бүрдәсн керг-үүлдвр болв. Ниицәнә гешүд социальн чинртә программд орлцад, мөнгнә мөрә шүүж авв. Эн мөнгәр олн үртә өрк-бүлмүдин төлә кергтә хот-хол болн дулан хувцн хулдж авгдв. Ода районд олн үртә тәвн өрк-бүл бәәнә.
