Эндр Афганистанас церг харһсна хөрн һурвн жилин өөн болжана
Эндр Афганистанас церг һарһсна хөрн һурвн жилин өөнд нерәдгдсн тенд дәәлдсн цергчнрин керг үүлдвр болв. Советск Союзин церг тенд йисн жилдән бәәв. Найн йисдгч жилин февралин арвн тавнд СССР-ин дөчдгч әәрмин сүл церг тендәс һарсмн. Афганистанд болсн дәәнд арвн тавн минһн мана салдснр әмнәсн хаһцв. Эндр тенд церглсн әмтн, «Боевое братство» нертә региональн әнглә хамдан Афганистанд әмнәсн хаһцсн улсин санлынь тодлв. Элст балһсна цутхлнг тавлнгас авн эдн экләд Баатрмудын аллейяр йовж, Иньглт паркд бәәх мөнк залд күрәд гүрмр болн әмд цецгүд тәвцхәв.
Дигтә эндр Афганистанд дәәлдж йовсн улсин санлд нерәдгдсн концерт болв. Мана танһчин үүдәгч колективмудын тәвсн концерт ветеранмудт икәр таасгдв. Келхд, концерт төрскән харсгч алдр дәәнд орлцсн ветеранмуд бас ирв. Эн ик чинртә керг үүлдврт мана Танһчин толһач Алексей Орлов бас орлцв. Ветеранмудт ханлтан өргәд, цааранднь эрүл менд, цаган хаалһ дурдв.
