Эн жиләс авн Әрәсән аһуд Беларуссяс болн Казахстанас ирж көдлжәх улс амрар темдглж бичгдх
Эн жилин январин нег шинәс авн Әрәсән аһуд Беларуссин болн Казахстана әмтнә күч-көлснә үүлдвр күцәлһн амрар кегдх. Давсн жилин ноябрь сард эн һурвн орн-нутгин хоорнд шишлнг зөвшәлт батлж авгдв. Күч-көлснә мигрантнрт ямаран льгот өггджәнә, зака эвдсн улсиг альд бәәлһхмб.
Федеральн миграционн церглтин танһчин әнгин көдләчнр маднд зәнглсәр, һурвн орн-нутгин хоорнд батлж авсн бооцан эн жилин январин нег шинәс авн үүлдврт орв. Ода Казахстана болн Беларусин күч-көлснә мигрантнр мана орн-нутгт шишлнг зөвшәл угаһар болн йилһд өгсн көдләчнрин кемжән угаһар ирж көдлж чадх. Тер мет Әрәсән гражданмуд бас эн орн-нутгудт иигж йовж көдлж чадх. Хальмг танһчин миграционн церглтин энгин ахлач Эрдни Авшиевин келсәр, мана танһчд эн халхар ик көдлмш кегджәнә. Беларуссин болн Казахстана көдләчнр ода нааран ирәд амрар көдлж чадх. мана улс болхла боомтг угаһар эн хойр орн-нутгт одад бас көдлж чадх.
Дәкәд болхла шин зокалар, Беларуссяс болн Казахстанас ирж көдлжәх әмтн эрк биш көдлжәх ордмна күч-көлснә бооца батлж авх зөвтә. Тиигхлә эдниг болн эднә өрк-бүлмүдиг миграционн тоод авх. Энүнә төлә эднд һучн хонг өггджәнә. Талдан мигрантнрт зуг долан хонг өггднә. hазадын ордудас ирсн гражданмуд иим некевр эс күцәһәд, күч-көлснә закад эвдхлә, эдниг гшертнь йовулхин өмн альд бәрхин медгджәхш. Миграцин зака эвдлһнлә ноолда кедг әнгин ахлач Баснг Лиджиевин келсәр. Хальмг танһчд зака эвдсн мигрантнриг дав — зуур бәрдг һазр уга болад, сүл цагт эн халхин көдлмш мууһар кегджәнә. Хальмг танһчин миграционн зака эвдлһнлә ноолда келһнә әнгин ахлач Баснг Лиджиевин келсәр, хойр минһн арвдгч жилд мана танһчас жирн мигрантнр гер талан йовулгдх зөвтә бәәсмн. Эдниг хамдан ирж көдлжәх улсла хамднь бәәлһвин, болв йосн күн орһад йовж одла.
Давсн жилин декабрь сард хальмг танһчин олн-әмтнә хурал зака эвдсн мигрантриг дав зуур бәәлһдг бәәрн тогталһна туск зака батлж авсн билә. Иим учреждень танһчин бюджетас мөнгәр теткгдхмн. Ода болхла ирлцнһү гер энүнә төлә хәәгджәнә. Иим бәәрн өдгә цагт Әрәсән долан субьектд үүлджәнә.
Татьяна Дмитриева, Хулхачин Николай
