Эн жил хөрн хойрдгч тойгта бичкдүдин сад балһсна марһанд диилвр бәрв
Эн жил Элст балһсна хөрн хойрдгч тойгта бичкдүдин садын коллектив балһсна марһанд диилвр бәрв. Иим күндтә нер зүүхд маднд бахмжта болна гиж садын көдләчнр келнә. Марһанд үзүлсн эднә программ талдан бичкдүдин садмудын төсвәс йилһрнә. Хөрн хойрдгч садын сурһмжлачнр бичкдүдин билг делгрүлһнә төлә эврә методик үүдәж олзлжана. Балһсна марһанд диилвр бәрәд һучн минһн арслнга мөрә шүүж авв. Энүнә тускар тодрхаһар мана сюжетд келгджәнә.
Зург зурлһн, олн-зүсн аппликац келһн болн талдан чигн урн һарин эрдм бичкдүдин үүдәлтин билгиг делгрүлнә. Эн бичкдүдин садт сурһмжлачнр эврәннь үүдәсн методикар кичәлмүдән давулна. Эднә келсәр, көвүд-күүкд кергтә медрл авсн деерән, кичәлмүдт дурлж орлцна, олн-зүсн кегдлмуд кехдән дурта болна. Бичкдүдт садт цугнь таасгдх зөвтә. Олн-зүсн наадн, талдан көвүд-күүкдлә үүрлж наадхдан дурта болх зөвтә, соньн кичләмүд болн шимтә хот-хол таасгдх зөвтә. Эн программиг бичкдүдин садын коллектив дошкольн учрежденьс дунд болсн балһсна марһанд йовулв. СНХ хөрн хойрдгч тойгта бичкдүдин садын сурһмжлач Ирина Музраеван келсәр, зург зурдг эрдмәр давжулад, төрскнч сурһмж өгх күцл тәвжәнәвидн.
Ирина Музраева дүрслгч искусствин багш Эн садт дүрслгч искусствин студь бәәнә. Энүнд көвүд-күүкд зург зурдг дассн деерән, эргндк йиртмжд дуран өгәд, үүдәврмүдән зурна. Эднә зурсн зургудын һәәхүл чигн секгднә. Бичкдүд дунд билгтә көвүд-күүкд бәәнә. Иим нег кичәлд күүкд эврәннь наадһасин төлә хальмгин зег кеж һарһв. Бичкдүд хальмгин уул зег кедг дасна, у-өргн тег зурхдан дурта.
Марһанд диилвр бәрәд шүүж авсн һучн минһн мөрән мөнгәр бичкдүдин садын материаль-техническ ул батрулгдв. кергтә ясвр кегдв, шин мебель хулдж авгдв. Келхд, давсн жилд эн дошкольн учреждень хальмг танһчин толһачин зун минһн арслнга мөрә бас шүүж авла. Садын һардач Лидия Насунован келсәр, иим сән күцәмж бәрснд энд көдлжәх улсин ик тәвц бәәнә.
Ода Элст балһсна хамгин сән гисн хөрн хойрдгч тойгта бичкдүдин садт орхар хойр зун көвүд-күүкд чеерүдт зогсжана. Энд көдлжәх улст иткәд, эк-эцкнр эврәннь үрдүдән даалһжах герч болжана.
