Эн жил Хальмгин олн-әмтнә шүлгч Эрнжәнә Константина зун жилин өөн күцх
Эн жил Хальмг танһчин олн-әмтнә шүлгч, орчулач, келн-улсин амн үгин зөөр, авьяс сәәнәр медж йовсн билгтә келмрч Эрнжәнә Константина зун жилин өөн темдглгдхмн. Ончта өөнлә ирлцүлж шүлгчин күүкнь Светлана Эрендженова эцкиннь хувц-хунр, дегтрмүд болн талдан чигн зөөриг келн-улсин музейд белглв. Иим экспонатмудыг хәләхлә, Эрнжәнә Константин олн-зүсн халхар билгтә күн бәәж гиж медгднә. Байрин йовудт Эрнжәнә Константина Светлана күүкнь келн улсин музейд эцкиннь дегтрмүд белглв. Энүнә келсәр дорас өсч йовх баһчуд музейд одхларн нер туурсн эцкиннь тускар, энүнә кесн көдлмшин тускар медж авх. Тер юнгад гихлә, Эрнжәнә Константин гүн номта, авг бәрц меддг билгтә күн билә. Байр-нәр болхла хальмг зевсгәр наадад олн иньгүдән, элгн садан байрулж йовсмн, һартан йир өөтә чадмг күн билә. Энүнә бичсн дегтрмүд өдгә цагт дорас өсч йовх көвүд күүкдт болн хальмг кел заажах багшнрт алтнас үнтә зөөр болжана.
