Эн жил Әрәсәд туужлгч жил болжана

Эн жил Әрәсәд туужлгч жил болжана. 1812-гч жилә дән эклснә 200 зун жилин өөн күцв. Тер дәәнәд мана һазра улс бас зөрмг йовдлан үзүлж, төрскән харсч йовсмн.

Танһчин барун ар үзгт Шорв һолын көвәд, Талтахна әәмг кезән-кезәнәс нааран бәәршлә бәәһә юмн. hазр болһнд эврә нертә улс бәәдг. Тиим улсар Талтахна һазр байн мөн. Теднә негнь 1812-гч жилә дәәнә орлцач Манк Талтаев болжана. Хальмг олн-әмтнә туужд учрсн йовдл баһ биш. Ямаран күнд цаг болвчн хальмгуд орн-нутгиннь төлә арһ-чидлән һарһж, төрскнәннь төлә дәәлдж, баатр-зөрмг йовдлан үзүлж йовсмн.

Туужлгч 1812-гч дәәнд орлдсн улсин нерд алтн үзгәр туужд бичгдсмн. Шидр амр Санана нертә дегтрин сангд дигтә тер дәәнд орлцсн талтан манкин бәәдл-жирһлд нерәдгдсн керг-үүлдвр давв. туужин номин доктор, баһ наста номт Очра Уташ Талтан Манкин тускар тодрха цәәлһвр кев. Зөрмг дәәч, чадмг һардач Талтан Манк дәәнә түрүн өдрәс авн чилгч күртлнь Есаулин цол зүүл йовсмн. 1812-гч дәәнә зун жилин өөнлә ирлцүлж Әрәсән Екатерина хатн Талтаевин үйнрт алтн үлд бәрүлж өгсн болдг.

Керг-үүлдврт орлцсн баһчуд соньн зәнгсиг оньган өгч сонсв. дорас өсч йовх баһукелн-әмтнәннь туужар соньмсч, алдр баатрмудин нердиг медхәр. делгрүлхәр зүткдгнь бас темдглх кергтә.

Харһлтд орлцсн скульптор Степан Ботиев манк Талтаевин үйнрин тосхсн школд сурч йовсн цаган тодлад, тер жилмүдин тодлврарн хувалцв. Эн жил Степан Кимович талтан Манкин бумб талтахна һазрт Цаһан-Нур селәнд босһхар зуралжана.

Эврә хөвдән болхла би бас Талтахна һазра күн болжанав.

Өвдг цә өөкнд

Тоха цә тоснд

Таварн бәәдг

Талтахна әәмг гиж ах үйнрин келж йовсн тоотиг тодлнав.

Чинртә харһлтд талтан манкин элгн-садн бас орлцв. теднә негнь дегтрин сангин көдләч Юлия Даниловна Биткеева-Талтаева аав-ээжәсн сонсч медж йовсн соньн-соньн зәнгәрн хувалцв.

Филолог номин доктор Николай Цеденович Биткеев болхла кезәнә нег цагт Цаһан-Нур селәнд бәәршлж йовсн Канкан Санж гидг күүнәс талтан Манкин туск ду бичж авсмн.

1812-гч жилә дәәнх цагас авн хойр зу шаху жил давв. Тер дәәнд орлцсн мана һазра улсин бәәдл-жирһл цаг холдх дутм олн дунд соньмслт олад йовна. Нег үлү дорас өсч йовх баһчуд тиим улсин тускар сәәнәр медхәр седжәхнь байрта йовдл гиж сангдна.

Нәдвдә Тамара, Бадмаран Владислав