Эн сурһулин жиләс авн Хальмг Деед сурһульд журналистикин шин эрдмин әнг секгдв

Тадн танһчин зәнг шуд эфирт хәләжәнәт. Һарцан цаарандан өгчәнәвидн. Эн сурһулин жиләс авн Хальмг Деед сурһульд журналистикин шин эрдмин әнг секгдв. Энүнд сурчасн оютнрин түрүн баг төрскн келән, сойлан, өвкнриннь авг-бәрцән дассн деерән, журналистин эрдмин нуувчлань таньлджана. Негдгч курсин оютнрла мана үүдәгч баг харһад, эднә сурһуляр соньмсв.

Хальмгин болн Дорд үзгин филологин институтд баһчуд төрскн келән, англь болн китд кел дасна. Ода болхла, дәкәд нег соньн әнг бүрдәгдв. Журналистын эрдмин әнг Хальмгин Деед сурһульд түрүн болж секгдв. Ода энүнд 12 көвүд-күүкд сурһулян дасчана. Теднә негнь Нәдвдә Цецн.

Багшнрин келсәр, эн багин оютнр дааврта болсн деерән, да3гин бийдән шин соньн медрл шингәж авх зүткнә. Мингиян Алексеевич Лиджиев эн багин оютнрин куратор болж көдлж йовна.

Журналистикин әнгд сурһуль сурчах баһчуд хальмг кел бас дасчана. Тегәд иргчд эдн зуг орсар биш, хальмг келәр чигн сәәнәр бичх зөвтә. Онц заахд, арвн нәәмн наста Елена Костина мана танһчд зуг һурвн жилдән бәәнә. Күүкнә өрк-бүл Пермь балһснас Элстүр нүүж ирв. Энд Лена билгтә бичкдүдин цутхлнгд орв. Күүкнә келсәр, Элст балһсн энүнд йир таасгдна. Мана улсин сойл, авг-бәрц Ленад соньн. Тегәд медрлән цааранднь гүүдүлхәр, күүкн хальмгин университетд орв.

Доржин Аюна болхла школд сурһуль сурчасн кемд гуманитарн предметмүдәр соньмсдг билә. Бичкнәс авн умшхдан дурта, сул цаган күүкн дегтрин сангд одад, медрлән гүүдүлнә.

Келхд, хальмгин университетд Пеликон нертә телестудь көдлжәнә. Энд оютнр эврәннь репортажмуд кенә. Иргчд болхла эдн мана та3һчин журналитснрин ханьд орад, олнд зәнглһнә көдлмш сәәнәр күцәх гиж нәәлжәнәвидн.