Элстин захт бәәх улсин бәәдл жирһл му

Элст балһсна захт бәәх әмтн олн жилмүдин эргцд көк түлә, электрокүчн, йовдг хату девскртә хаалһ уга бәәнә. Энд бәәх улс олн жилмүдин эргцд депутатнрт кесг эрлһ бичв болв ормасн керг көндрсн уга, тер кевәрн әмтн бәәжәнә.

Элст балһсна мәрийн специалистнр ирх гисн зәнг сонсад Аршань болн Солнечный селәдын әмтн селәнә цаглань клубд хурв. Кесгәс нааран эднлә тиим харһлт бүрдәгдсн уга билә. Хаһлх төрмүд дала, эн төрмүд олн улсиг үүмүлжәнә. Әәдрхн балһснд бәәх көк түләнә конденсат олн улс харшан күргжәнә, тендәс салькн үлхлә әмтн маск өмсәд йовна аһар йир му болна.

«Роспотребнадзорин» ахлач Константин Яшкуловин келсәр бидн эн кергиг хаһлх санатавидн, болв эн керг нег өдрин эргцд күцәж болшго. Цуг хамдан негдүләд эн керг хаһлхла ашнь сән болх гиж ахлач Яшкулов келв.

Болв Әәдрхнә көк түләнә конденсатын төр һанцхн төр биш. Хургт ирсн әмтн көк түләнә, электрокүчнә, хаалһин төрмүдин тускар ахлачнрас сурв. Кезә эдн балһсна әмтнлә әдл бәәхин тускар сурч медв. Степная, Утренние Зори нертә уульцст бәәх әмтн сүл жилмүдт электрокүчн уга бәәнә. “Теегин Айс” нертә уульнцд бәәх әмтн хур цасн орхла дангин резин һосн өмсәд йовна, тегәд кезә хату хаалһ бидн бәәхвидн эдн хәәкрж сурв. Балһсна мәрийн специалистнр эн һол төрмүд оньган авч цөн өдрин эргцд хаһлхвидн гиж әмтнд келв.

Цааранднь мәрийн специалистнр Лола поселкин улсла харһв, эн хар, лт садв гемин диспансерт давб. Эн поселкин әмтн бас олн жилдән хаалһ уга, көк түлә уга бәәнә. Мана селәнд бас көк түлә, хату хаалһ, электрокүчн уга гиж харһлтд орлцсн әмтн келж өгв.

Олн жилмүдин эргцд сән жирһл үзссн уга улс эн харһлт бүрдәсн мәрийн специалистнрлә цүүглдәд, цуг мана төрмүдиг цаглань хаһлтн гиж сурв.

Әмтиг зөөдг “ГАЗелин” тускар бидн һол оньгтан авхувидн гиж мәрийн специалистнр олн әмтиг иткүлв. Үвлин цагт усн уга улст дөн бас ирх гиж мәрийн көдләчнр келв. Невчкн дулархла нааран интернет, усна суврлжн бас нааран татгдх, эм хулдг аптек бас энд секгдх.

Хавтха Элла, Очра Сергей