Элстин захд бальчг болхла, әмтн йостаһар түржәнә

Намр экләд, хур орхла Элстин захд бәәх улс йосндан түрнә. Хаалһар йовдг арһ уга болна, энд-тенд нүкн болн бальчг. Асфальтн хаалһ күртл бәәрн әмтн резин калош эс гиж һос өмсәд күрнә.Нег үлү, бачм чинртә медицинск дөн күргдг машин нааран ирж чаджахш.

Эн районд бәәх әмтн хур орхла йостаһар түрнә. Асфальтн хаалһ күрхин төлә, эдн резин һос өмснә. Бәәрн дворникүдин тоолврар, хату девскртә хаалһд күрчкәд, әмтн полиэтилен пакетмудан энд-тенд хайчкна.

Сурһульчнр болхла һос өмслго асфальтн хаалһд күрнә.Талдан бчикдүдиг дураһад, нег-негнләрн дөрлдәд эдн һос башмган әрвлхш. Болв хамгин ик түрү медәтә улс үзжәнә. Хая-хая һаза һардг улст иим бальчгт хату девскртә хаалһд күрч болжахш. Эднә келсәр, хур орад, бальчг болхла, йоста зовлнг болна. Нааран зуг тракторар ирж болх. Хату девскртә хаалһ кехәр һардачнр үгән өглә.Урдаснь бидн резин калош болн һос белдж авнавидн гиж бәәрн улс келнә.

Эн жил федеральн бюджетас ирсн мөнгәр Элст балһсна зәрм хаалһс шинрүлж ясгдв. Хотл балһсна мэрийн балһсна эдл-ахун заллтин ахлачин дарук Хонюр Эльдеевин келсәр, хаалһсин ясврт найн йисн сай арслнг һарв. Энүнә келсәр, ода цуг хаалһсин һурвна кесн хойр хүвнь шинрүлж ясгдад уга. Иим бәәдл ода Элстин өмн, ар болн деед үзгин райодт тогтв.Хотл балһсна хазнд мөнгн уга болад, шин хаалһс тосхгджахш. Ода зуг хуучн хаалһс шинрүлж ясгджана.

Синоптикүдин тааврар, иргч өдрмүдт хур оршго. Тер бийнь өмн болн ар үзгин райодын улсиг эн зәнг байрлулжахш. Намрин кемд хур орна, үвлин цагт цасн орад хәәлнә. Бальчг өвдкцә болна. Тегәд бәәрн улс оньдин тенгрин сән бәәдл күләх кергтә болжана.

Санкун Кермн Хулхачин Николай